REWORK - ბიზნესი ცრურწმენების გარეშე

წიგნი ინგლისურიდან თარგმნა დავით ახალაძემ. ბიზნესლიტერატურის უდიდესი ნაწილი ერთნაირ რჩევებს იძლევა: დაწერეთ ბიზნესგეგმა, შეისწავლეთ კონკურენტები, მოიძიეთ ინვესტორები და ა.შ. და ა.შ. თუკი ასეთ სახელმძღვანელოს ეძებთ, წინამდებარე ნაშრომი შეგიძლიათ თაროზე შემოდოთ. წაიკითხეთ ეს წიგნი და გაიგებთ, რატომაა გეგმები საქმისთვის საზიანო, რატომ არ გჭირდებათ გარეინვესტორები და რატომ უნდა უგულებელყოთ კონკურენცია. საქმე ისაა, რომ სინამდვილეში იმაზე ბევრად უფრო ნაკლები გჭირდებათ, ვიდრე გგონიათ. სულაც არაა აუცილებელი დღედაღამ შრომა, განსაკუთრებული კადრები, საკანცელარიო საქმიანობა და თათბირებში დროის ხარჯვა. ოფისიც კი არ გესაჭიროებათ. ეს ყველაფერი მეორეხარისხოვანია. ერთადერთი, რაც მართლა დაგეხმარებათ, ესაა ყბედობის შეწყვეტა და მუშაობის დაწყება. Rework-ი წარმოადგენს შესანიშნავ სახელმძღვანელოს მათთვის, ვისაც ოდესმე საკუთარი საქმის წამოწყებაზე უოცნებია. გამოცდილი მეწარმეები, მცირე ბიზნესის მფლობელები, ადამიანები, რომლებიც გამუდმებით საძულველ საქმეს აკეთებენ, შემცირების მსხვერპლნი, თუ ხელოვანები, რომლებსაც აღარ უნდათ შიმშილობა – ამ წიგნში რაიმე ღირებულ რჩევას ყველა იპოვის.