წინასიტყვაობა ჯორჯ ქლეისონის წიგნი - „ყველაზე მდიდარი კაცი ბაბილონში“ - უკვე 100 წლისაა, მიუხედავად ამისა, მისი იდეები კვლავ აქტუალურია როგორც მთელ მსოფლიოში, ისე საქართველოში. ჩვენს ქვეყანას წლები დასჭირდა იმისთვის, რომ გადასულიყო კაპიტალისტურ ეკონომიკურ მოდელზე, მაგრამ, სამწუხაროდ, ფინანსურ საქმიანობაში ჩაბმულ ბევრ ადამიანს არ მიუღია განათლება ამ მიმართულებით, შესაბამისად, ფულის დაბანდება, დაზოგვა და გონივრულად ინვესტირება არის ის გამოწვევები, რომლებიც დგას საქართველოს მოსახლეობის წინაშე. უნდა ვაღიაროთ, რომ ძალზე მწირია ის ცოდნა, რომელიც აქვთ ქართველებს ამ თემებთან დაკავშირებით.
წიგნის მთავარი მიზანიც სწორედ ეს არის - ასწავლოს ადამიანებს ფინანსების მართვა, ინვესტირება, ამის გარდა, ავტორი გვიზიარებს საინტერესო იდეებს, რომლებიც ამდენი ხნის შემდეგაც კარგად მუშობს წარმატების მიღწევის გზაზე. ზოგადად, ასეთი სახის ლიტერატურაში უნდა ეძებო იდეები, რომლებსაც გაიზიარებ და დანერგავ ცხოვრებაში, ჯორჯ ქლეისონის ეს წიგნი სწორედ ასეთია.
წიგნი სავსეა რჩევებით, რომლებიც დაგეხმარებათ გამდიდრებაში. ეს ის წესებია, რომლებსაც დღესაც იცავენ დიდი კაპიტალის მქონე წარმატებული ადამიანები, მიუხედავად იმისა, რომ ისინი ერთი საუკუნის წინ დაიწერა. წიგნში არა მხოლოდ იმაზეა საუბარი, თუ როგორ შეიძლება გამოიმუშავო დამატებითი ფულადი ნაკადები, არამედ არის რჩევებიც, რომლებიც დაგეხმარებათ თავი დაიზღვიოთ როგორც გაკოტრებისგან, ისე ფინანსური პრობლემებისგან.
და ბოლოს, წიგნში ავტორი საუბრობს იმაზე, თუ რამდენად მნიშვნელოვანია მუდმივი პროფესიული განვითარება იმისათვის, რომ გქონდეთ წინსვლა სამსახურში და შეძლოთ უფრო მეტი თანხის გამომუშავება.
ეს არის წიგნი, რომელიც აუცილებლად უნდა წაიკითხოს როგორც მოზარდმა, რათა მომავალში არ დაუშვას ფინანსური შეცდომები, ისე ზრდასრულმა ადამიანმა, რომელიც ფიქრობს განვითარებაზე და კაპიტალის დაგროვებაზე.
დავით კენჭაძე
DK კაპიტალის გენერალური დირექტორი
„რისი თქმა შეუძლია 1920-იან წლებში დაწერილ წიგნს თანამედროვე ინვესტორებისთვის მათი ფინანსების შესახებ? ბევრი რამის, თუკი ეს ჯორჯ ქლეისონის იგავების მომხიბვლელი კრებულია, რომელიც სიმდიდრის მოპოვებისა და შენარჩუნების საფუძვლებს განმარტავს. ეს არის დიდებული საჩუქარი კურსდამთავრებულთათვის და ნებისმიერი ადამიანისთვის, რომელსაც ფინანსურმა სამყარომ თავგზა აუბნია, გამოცდილ ინვესტორთათვის კი იგი სტიმულის მომცემი საკითხავი იქნება“.
Los Angeles Times
თქვენ წინაშე ისე გადაჭიმულა თქვენივე მომავალი, როგორც შორს მიმავალი გზა. ამ გზაზეა ის ამბიციები და სურვილები, რომელთა დაკმაყოფილებაც გსურთ. ამ სურვილების დასაკმაყოფილებლად კი ფული დაგჭირდებათ. გაეცანით მომდევნო გვერდებზე ნაჩვენებ ფინანსურ პრინციპებს. დაე, ყველა ჯიბეთხელს ამ პრინციპებმა გაუკვლიოს გზა იმ ბედნიერი ცხოვრებისკენ, რომელსაც სქელი ჯიბე უზრუნველყოფს.
როგორც მიზიდულობის კანონი, ეს „ფულის კანონებიც“ უნივერსალური და უცვლელია. დაე, ისინი თქვენი ჯიბის სისქეზე, საბანკო ანგარიშებსა და ფინანსურ პროგრესზე ისევე სასიკეთოდ აისახოს, როგორც ბევრი წარმატებული ადამიანის ცხოვრებაზე ასახულა.
მატერიალური სიმდიდრე ფულით იზომება.
ფული უამრავი სიამოვნების მიღების საშუალებას იძლევა.
ფული იმას აქვს, ვინც მისი დაგროვების წესი იცის.
ფული დღესაც იმავე კანონებს ექვემდებარება, რომლებიც ექვსი ათასი წლის წინ ბაბილონში მოქმედებდა.
ჩუქება
