წინასიტყვაობა თუ ფიქრობ, რომ ხელში მორიგი „როგორ მივაღწიოთ წარმატებას ბიზნესში“ წიგნი გიჭირავს, თუ მოცემულ მომენტსა და ვითარებაში შენი ცხოვრება კომფორტულია და გაკმაყოფილებს - არ გინდა მეტი შემოსავალი, უფრო საინტერესო საქმე, მჭიდრო, საჭირო და მრავალფეროვანი ურთიერთობები შენთვის ძვირფას ადამიანებთან; არ ფიქრობ უკეთეს ფიზიკურ ფორმაზე, სულიერი სიმშვიდისა და თანაზიარობის განცდის უფრო მაღალ ხარისხზე; არ გაწუხებს რაღაც დიადის შექმნისა და სამყაროს უკეთესობისკენ შეცვლის ყოვლისმომცველი სურვილი, მაშინ გირჩევ, რომ ეს წიგნი არ წაიკითხო.
ედ მაილეტის მსგავსად, მეც მჯერა: სამყაროში არავინ იბადება იმისთვის, რომ „რიგითი“ ან „ჩვეულებრივი“ იყოს. თითოეული ჩვენგანის მისია უნიკალურია. თითქოს პათეტიკურად ჟღერს, მაგრამ თუ გინდა იპოვო შენი უნიკალური მისია და ხორცი შეასხა მას, უპირველესად, მუდმივ გაუმჯობესებაზე უნდა იზრუნო - ყოველ ჯერზე უნდა ეცადო შექმნა საკუთარი თავის უკეთესი და უკეთესი, უკეთესი და უკეთესი ვერსია.
სასიამოვნო და მაცდური მოცემულობაა, არა?! როგორც წესი, ეს იდეა ბევრს სტიმულს აძლევს, ენთუზიაზმით აანთებს და ხშირად მოქმედებისკენაც უბიძგებს. შეიძლება ორშაბათიდან მართლა დაანებო თავი მოწევას, ერთი თვის განმავლობაში ერთხელაც არ დააგვიანო სამსახურში, ანდა (როგორც იქნა!) გადაწყვიტო და ხელმძღვანელს ანაზღაურების გაზრდა სთხოვო. მაგრამ, თუ მოხდა ისე, რომ მეგობრებთან ერთობი, სვამ და ამ დროს ინსტინქტურად გამოგიწოდებენ სიგარეტს, რა იქნება? ან მაშინ, თუ ძველი ჩევევის გამო სამსახურში დააგვიანებ და მომხდარს ისევ საცობებს დააბრალებ? ანდა ანაზღაურების პროპორციულად გაზრდილი საქმის მოცულობა მძიმე ტვირთად დაგაწვება? არის იმის შანსი, რომ შენს მნიშვნელოვან გადაწყვეტილებებს ხანგრძლივად უერთგულებ?
თუ გულწრფელელობას გამოვიჩენთ, პასუხი იქნება: შანსი არცთუ ისე დიდია!
ამის საპირისპიროდ წარმოიდგინე, რომ ყველაფერი, რისი გაკეთებაც გჭირდება, შენი გადაწყვეტილებებისა და ცხოვრებისეული მისიის ერთგულებაა კიდევ ერთი დღის განმავლობაში – კიდევ ერთი სატელეფონო ზარის განხორციელება, კიდევ ერთი საქმიანი კონტაქტის დამყარება, კიდევ ერთი საათის გატარება სამსახურში, კიდევ ერთი საათის დახარჯვა სპორტდარბაზში, სიყვარულის კიდევ ერთი გამოხატვა, კიდევ ერთი ლოცვა, კიდევ ერთი მიზანი, კიდევ ერთი ოცნება...
არსებითად, კიდევ ერთის ძალა თვითგანვითარების თემაზე დაწერილი ყველაზე გამორჩეული წიგნია, რაც კი ოდესმე წამიკითხავს – ჩემი საქმიანობიდან გამომდინარე კი, ასეთი ბევრია. ეს წიგნი ედ მაილეტის ოცდაათწლიანი ცხოვრებისეული გამოცდილების ანარეკლია, მისი ფილოსოფიის ერთგვარი კულმინაციაა. მეტიც, ჩემი აღქმით, ეს წიგნი ავტორის არსებობის მიზეზთან ერთგულების დადასტურება და ადამიანების უპირობო სიყვარულის გამოხატულებაა.
ედ მაილეტი გვთავაზობს კიდევ ერთის გარშემო გაერთიანებულ ცხრამეტ ძირითად პრინციპს, რომლებიც, თავის მხრივ, წარმატებისა და ბედნიერების შეუცვლელი გზამკვლევის შესაქმნელად ყველა საჭირო სტრატეგიასა და ცნებას მოიცავს. თავების თანამიმდევრობაც წინასწარგანზრახული და ლოგიკურია. ჩათვალე, რომ ეს წიგნი შენი მატრიცის წითელი აბია, გასაღებია, რომელიც შენი, როგორც რჩეულის, კიდევ ერთის პრინციპით მოქმედისა და მოაზროვნის გონების კარს გააღებს.
ერთი შეხედვით, ედ მაილეტი ხორცშეხმული ამერიკული ოცნებაა. დისფუნქციურ ოჯახში, ალკოჰოლიკი მამის (რომელიც იმავდროულად, მისი გმირი და შთაგონების წყაროც იყო) გვერდით გაიზარდა, ფიზიკური ტრავმის გამო სპორტულ კარიერაზე უარის თქმა მოუწია, თავისი კოლეჯის დროინდელ სიყვარულზე დაქორწინდა; იმდენად ღარიბი იყო, რომ წყლის საფასურის გადახდაც არ შეეძლო ბინაში, რომელშიც ახალშერთულ ცოლთან ერთად ცხოვრობდა. ამას წარმოიდგენ და ადვილად მიხვდები, რამხელა მანძილით იყო დაშორებული მისი საწყისი წერტილი მისი სასურველი ცხოვრებისგან.
მერე, კიდევ ერთის პრინციპების გამოყენებით მეგაწარმატებულ სერიულ ანტრეპრენერად და მსოფლიოში ერთ-ერთ ყველაზე მოთხოვნად ინსპირაციულ სპიკერად გადაიქცა. 2023 წლის 6 ოქტომბერს USA Today-მ ის ამერიკის #1 უმაღლესი ეფექტიანობის ქოუჩად დაასახელა. ედ მაილეტის ქარიზმა და მაგნეტურობა, მისი უბრალოება და თავმდაბლობა, სხვათა დახმარებისა და სამყაროს უკეთესობისკენ შეცვლის ყოვლისმომცველი სურვილი გადამდებია.
მჯერა, რომ ამ წიგნში წარმოდგენილი სტრატეგიების გამოყენებით შენც შეძლებ უფრო წარმატებული, ჰარმონიული და ჯანსაღი ცხოვრება შექმნა როგორც შენთვის, ისე შენთვის ძვირფასი ადამიანებისთვის - ისეთი ცხოვრება, რომ უკანასკნელი ამოსუნთქვისას, შენი განვლილი გზით სიამაყის საფუძველი გქონდეს.
დაიწყე კიდევ ერთით!
ასე შესაძლოა ცხოვრების საიდუმლოსაც ჩასწვდე.
თამთა ჯაფარაშვილი
ლურჯი ოკეანის ხელმძღვანელი
ჩუქება
