წინასიტყვაობა ეს წიგნი უოლტერ აიზეკსონის მორიგი ოსტატურად დაწერილი ბიოგრაფიაა, რომელიც არა მხოლოდ მასკის მიღწევებს, არამედ მის შინაგან სამყაროს, იდეალებსა და წინააღმდეგობებს ასახავს.
მასკით აღფრთოვანება ჯერ კიდევ 2000-იანების ბოლოს განვიცადე. ის ნამდვილი ნოვატორია, რომელიც სამყაროს ახალ რეალობას სთავაზობს, განსაკუთრებით - განახლებადი ენერგიების სფეროში, რომელშიც უკვე წლებია ვსაქმიანობ. ეს კი ის სფეროა, რომელიც სწორედ მასკის იდეების წყალობით სულ სხვა საფეხურზე ავიდა. მისი ინოვაციური ხედვები მხოლოდ კოსმოსის კვლევასა და ელექტრომობილებს არ მოიცავს.მასკის ხედვა ყოველთვის იმაზე მეტია, ვიდრე კონკრეტული ტექნოლოგიების შექმნა – ეს არის სურვილი შეცვალოს არსებული წესები, რაც ჩემთვის, როგორც განახლებადი ენერგიების სფეროში მომუშავე ადამიანისთვის, განსაკუთრებით რეზონანსული იყო. მისი მიდგომა - "არ არსებობს შეზღუდვა, მხოლოდ გამოწვევებია" - ჩემთვის გახდა ერთ-ერთი მთავარი ინსპირაცია, როგორც პროფესიული, ისე პირადი არჩევანებისთვის.
აიზეკსონი გვიყვება მასკის ბავშვობაზე სამხრეთ აფრიკაში, გვიჩვენებს მის რთულ და არაპროგნოზირებად პიროვნულ ურთიერთობებს, პირველ წარმატებებსა და დიდი იდეებისკენ მიმავალ გზას. ეს ისტორია გვიხსნის, როგორ ჩამოყალიბდა ადამიანი, რომელმაც ყოველდღიურ რეალობად აქცია ელექტრომობილები, კოსმოსში მოგზაურობა, რობოტები და ხელოვნური ინტელექტი.
მისი კარიერის მთავარი გასაღები მხოლოდ ინოვაციები როდია – ეს არის დაუღალავი სწრაფვა იმისკენ, რომ შეცვალოს ის, რასაც სხვები შეუძლებლად მიიჩნევენ. მასკი ადამიანის შესაძლებლობების საზღვრებს მუდამ აფართოებს, წარმოუდგენელ მიზნებს ისახავს და მათ მიღწევას რეალობად აქცევს. წიგნში ვკითხულობთ, როგორ უმკლავდებოდა იგი კრიზისებს, როგორ გადაარჩინა SpaceX-ი და Tesla გაკოტრებას, როგორ დაუპირისპირდა სტანდარტებისა და წესების შეზღუდვებს, რომლებიც მისთვის უბრალოდ მორიგ გამოწვევებს წარმოადგენდა.
მასკი მხოლოდ წარმატებული ანტრეპრენერი არ არის. მისი პიროვნება მოცულია წინააღმდეგობებით - ის არის ულტრარაციონალური, მაგრამ ემოციური; გენიოსი, მაგრამ მოუთმენელი; მილიარდერი, მაგრამ მუდამ რისკის ზღვარზე მდგომი. აიზეკსონი გვიჩვენებს მის დაუნდობელ სამუშაო ეთიკას, ურთიერთობებს თანამშრომლებსა და ოჯახთან, და იმ საფასურს, რომელსაც ის წარმატებისთვის იხდის.
მასკი შეიძლება უმუხრუჭო და უშიშარი ადამიანის შთაბეჭდილებას ტოვებდეს, მაგრამ თუ კარგად ჩავუღრმავდებით ამ წიგნს, დავინახავთ, რამდენად შიშებით მართულია მისი ცხოვრება. მისი ყოველი გიჟური იდეა, ახალი პროექტი თუ წარმოუდგენლად ამბიციური გადაწყვეტილება, შესაძლოა, სწორედ შიშისგან თავის დაღწევის მცდელობა იყოს. აიზეკსონი ერთ-ერთ ეპიზოდში გვიჩვენებს, როგორ თქვა უარი მასკმა აიაჰუასკას დალევაზე, რადგან შეეშინდა შინაგანი დემონებისთვის თვალებში ჩაეხედა. მასკი მუდმივად მოძრაობაშია – თითქოს გაჩერება მისთვის ყველაზე დიდი საფრთხეა. ეს წიგნი გვასწავლის, რომ მისი უშიშრობა, სინამდვილეში, შეიძლება, შიშებისთვის თავის არიდების ყველაზე დიდი გამოვლინება იყოს. დაბოლოს, ყველაზე ღირებული გაკვეთილი, რომელიც მასკის ისტორიამ მომცა, ის არის, რომ ნამდვილი წარმატება მხოლოდ მაშინ მოდის, როდესაც საკუთარ შიშებს თვალს გავუსწორებთ და მათთან გამკლავებას ვისწავლით.
სიმბოლურია, რომ წიგნის ქართულენოვანი გამოცემა ემთხვევა იმ დროს, როდესაც მასკი პოლიტიკაში ჩართვას იწყებს. ეს მოვლენა, ახალ შესაძლებლობებთან ერთად, ახალ საფრთხეებსაც წარმოშობს. როცა ექსცენტრულ და საზღვრებს მიღმა მოაზროვნე ადამიანს ძალაუფლებისა და გავლენის დამატებითი ბერკეტები ეძლევა, შედეგი შეიძლება ან კაცობრიობის უდიდესი პროგრესი იყოს, ან - ყველაზე რისკიანი ექსპერიმენტი, რომელიც კი ოდესმე ჩატარებულა. წიგნი მოგვითხრობს სწორედ იმ ადამიანზე, რომელიც ამ ექსპერიმენტის საჭეს უზის და "გაზის" პედლისთვის ბოლომდე აქვს ფეხი მიჭერილი! მხოლოდ დრო გვიჩვენებს, იქნება ეს კაცობრიობისთვის წინ გადადგმული ნაბიჯი თუ გადამწყვეტი შეცდომა, მაგრამ ერთი რამ ცხადია: ილონ მასკი არასდროს ირჩევს უსაფრთხო გზას - და სწორედ ამიტომ მის ისტორიას ყურადღებით უნდა დავაკვირდეთ.
გიორგი აბრამიშვილი,
ანტრეპრენერი, განახლებადი ენერგიებისა და მონაცემთა ცენტრების სფეროში
