წინასიტყვაობა ბრაიან თრეისი მსოფლიოში ერთ-ერთი ყველაზე ცნობილი სპიკერია გაყიდვებისა და ლიდერობის საკითხებში. ამასთან, მას დაწერილი აქვს არაერთი წიგნი თვითგანვითარებასა და მოტივაციაზე. 2015 წელს მან ღონისძიება გამართა თბილისში, რაც ნამდვილად წლის ბიზნესმოვლენად იქცა, თუმცა მანამდე კრიტიკული მოსაზრებებიც ისმოდა და ასეთი სკეპტიკური ვარაუდიც: რამდენად მოერგებოდა მისი რჩევები და წესები ქართულ რეალობას. მაგრამ თამამად შეიძლება ითქვას, რომ ბრაიან თრეისის მასტერკლასი აღმოჩნდა ყველაზე დასამახსოვრებელი და პრაქტიკული ღონისძიება, რომელიც ჩვენს ქვეყანაში გამართულა და რომელზეც დღემდე ლაპარაკობენ.
"გაყიდვების ფსიქოლოგია" ბრაიან თრეისის ერთ-ერთი გამორჩეული წიგნია. მასში საუბარია ისეთ მნიშვნელოვან თემებზე, რომლებიც გაყიდვებისადმი სტანდარტულ დამოკიდებულებებსა და წარმოდგენებს ცვლის, ამ ცვლილების შედეგები კი გაყიდვების მაჩვენებლებში აისახება. ამის მიღწევა, ერთგვარად, ფსიქოლოგიურ მიდგომებს ეფუძნება - იმის ცოდნით, თუ რატომ ყიდულობენ ადამიანები იმას, რასაც ყიდულობენ, რა არის მყიდველის მოტივაცია, გაყიდვების აგენტი ახერხებს მიზნების დასახვასა და შემდეგ მათი მიღწევის გზების პოვნას.
რა მნიშნველობა აქვს შეხვედრების რაოდენობას გაყიდვებში და რამდენად მნიშვნელოვანია საკუთარი თავის სწორად შთაგონება? პასუხებს ამ კითხვებზეც მიიღებთ, წიგნის დასასრულს კი ათი პრაქტიკული რჩევა გელოდებათ, რომელიც გაგიმარტივებთ საქმიანობას გაყიდვების სფეროში.
ბრაიან თრეისის "გაყიდვების ფსიქოლოგია" მარტივი ენით, დამაჯერებელი არგუმენტებითა და პრაქტიკული მაგალითებით გიკვალავთ გზას გაყიდვებში. ამდენად, ის საინტერესოა ყველასთვის, ვისაც გაყიდვების სფერო აინტერესებს. გაყიდვები კი ჩვენი ყოველდღიურობაა.
დავით ჩიკვაიძე
საერთაშორისო გაყიდვების ინსტიტუტის დამფუძნებელი, ტრენერი
ჩუქება
