სოხუმი - ჩემი იერუსალიმი

ეს წიგნი დაწერილია ციხეში, 2014 წელს, საქართველოში რუსული რეჟიმის გარიჟრაჟზე, მაშინ, როცა საზოგადოების უდიდეს ნაწილს ჯერ კიდევ ვერ ჰქონდა შემჩნეული ის საფრთხე, რომლის წინაშეც იდგა ქვეყანა. აქ თავმოყრილია საქართველოს უახლოეს წარსულთან დაკავშირებული მცირე, პირადი გამოცდილება - იმის სათქმელად, რომ რეალურად შეგვიძლია უამრავი ამოცანის გადაჭრა, ისეთებისაც კი, რომლებიც ერთი შეხედვით შეუსრულებელს ჰგავს. ასე ხდებოდა მაშინ, როცა საქართველო, თუნდაც მცირე ხნით, იყო ღირსებაზე პრეტენზიის მქონე სახელმწიფო, როცა გვჯეროდა საკუთარი ძალის. სულისკვეთება, რომლითაც შეიქმნა ეს წიგნი, ეყრდნობა ურყევ რწმენას, რომ საქართველოს თავისუფლად შეუძლია ყველაფერი და რომ ყველაფერი გამოგვივა მხოლოდ მაშინ, თუ მოვინდომებთ, არ დავნებდებით და გულწრფელად ვიმუშავებთ ამისთვის. ეს არის რწმენა. რომელიც იბადება ტკივილში, ძლიერდება წინააღმდეგობაში და ცოცხლობს მაშინაც კი, როცა იმედი თითქოს ქრება. დღეს, როცა სიტყვები თითქოს გაცვეთილია და თითოეულ მნიშვნელოვან სიტყვას ფასი აქვს დაკარგული, ეს მარტივი ჭეშმარიტება შეიძლება არადამაჯერებლად ჟღერდეს. მაგრამ უნდა გვახსოვდეს, საქართველოს აქვს უნარი შექმნას ძლიერი, მსოფლიო კლასის სახელმწიფო, გაერთიანებული საქართველო, მდიდარი და დემოკრატიული ქვეყანა, რომელიც იწყება ფსოუდან, გაგრიდან.