"მუჰამადის დაბადება მსოფლიოს ერთ-ერთი უდიდესი რელიგიის, ისლამის ფუძემდებელი მუჰამადი დაიბადა 570 წელს არაბეთის ნახევარკუნძულის ჩრდილოეთით მდებარე ჰიჯაზის მხარეში. დაბადების დღის და რიცხვის შესახებ მუჰამადის ბიოგრაფები და ჰადისების ავტორები განსხვავებულ ცნობებს გვაწვდიან. თუმცა, მათი უმრავლესობის თანახმად, მუჰამადი პარასკევს, 17 რაბიყ ალ-ავვალს დაბადებულა, სხვანი კი ამბობენ, რომ წინასწარმეტყველი აღნიშნული თვის 10 რიცხვში დაიბადა. სხვათა შორის, დაბადების წელზეც სხვადასხვა მოსაზრებას გამოთქვამენ, თუმცა ისლამის ავტორიტეტულ მკვლევართა მიხედვით, მოციქული ""სპილოს წელიწადს"", ანუ იმ წელს დაბადებულა, როცა ეთიოპიის ქრისტიანმა განმგებელმა აბრიჰამ წარუმატებლად ილაშქრა მექაში. მექელებზე დიდი შთაბეჭდილება მოუხდენია მომხვდურთა საბრძოლო სპილოს და სწორედ ამიტომ წელიწადისთვისაც ""სპილოს წელი"" უწოდებიათ. დადგენილია, რომ აბრიჰას ლაშქრობა 570 წელს მომხდარა, ამიტომაც უფრო სარწმუნოდ მოციქულის დაბადების ეს თარიღი უნდა მივიჩნიოთ. ისლამის ევროპელი მკვლევრები, მაგალითად: თეოდორ ნოლდეკე, რ. დოზი თუ ე. ა. კრიმსკი, ისლამს ""უსასწაულებო რელიგიას"" უწოდებენ. ამით ისინი ხაზს უსვამენ იმ ობიექტურ გარემოებას, რომ ისლამში, ყოველ შემთხვევაში - დასაწყისისათვის, იუდაიზმისა და ქრისტიანობისაგან განსხვავებით, არა გვხვდება სხვადასხვა ტიპის სასწაულებრივი გადმოცემები მოციქულის ზებუნებრივი დაბადებისა თუ მისი გამორჩეულობის დამადასტურებელ ზეციურ ნიშანთა შესახებ. იმ რამდენიმე გადმოცემასაც, რომელიც მუსლიმურ წყაროებში ამასთან დაკავშირებით დასტურდება, ზემოთ ნახსენები მკვლევრები მოგვიანო ხანისა და ანალოგიურ ქრისტიანულ გადმოცემათა მიბაძვით შექმნილ ნიმუშებად მიიჩნევენ, თუმცაღა ჰადისებში შემონახულ რამდენიმე ასეთ ყველაზე გავრცელებულ ცნობას ჩვენ მაინც დავიმოწმებთ, მაგალითად, მუჰამადის პირველ ბიოგრაფს - იბნ ჰიშამს - მოაქვს ჰასან იბნ საბითის ცნობილი არაბი პოეტის მონათხრობი: ""მაშინ მე 7-8 რვა წლის ბიჭი ვიყავი, მაგრამ ყველაფერს, რაც ჩემ გარშემო ხდებოდა, კარგად აღვიქვამდი. ერთ დღეს, მედინის ერთ-ერთი ციხესიმაგრის თავზე ვიღაც იუდეველი დავინახე, რომელმაც დაიძახა: ჰეი, იუდეველნოო! როცა მისი თანამერჯულენი ციხესიმაგრის კედელთან მოგროვდნენ და ჰკითხეს, რას გვეტყვიო, კაცმა მიუგო: იცოდეთ, ვარსკვლავი, აჰმადის მოსვლა რომ უნდა ეუწყებინა, წუხელ აენთოო."" ""ას-სირათ ალ-ჰალაბიასა"" და მუჰამადის სხვა მატიანეებში კი მუჰამადის დედის ამინა ბინთ ალ-ვაჰაბის მონათხრობს იმოწმებენ, რომელსაც უთქვამს: ""როცა ბავშვი დაიბადა, უცებ თვალისმომჭრელი სინათლე გამოჩნდა და აღმოსავლეთ-დასავლეთი გადაანათა. მე კი იმ სინათლეზე აშ-შამის - სირიისა და ბასრის სასახლენი დავინახეო"". ასევე ამბობენ, რომ იმ ღამით სპარსეთის ძლევამოსილი მბრძანებლის ქვითკირით ნაგები სასახლე, რომლის ასაშენებლადაც წლობით გარჯილიყვნენ და უხარვეზოდაც ეშენებინათ, უცებ შუაზე გადაიხსნა და ქონგურიც ჩამოექცა. კიდევ ერთი ჰადისი, რომელსაც სხვაზე მეტად დაჰკრავს ზღაპრული ელფერი, მაგრამ სხვაზე მეტსაც გვეუბნება ისლამის სიმბოლიკაზე, მოგვითხრობს: ""იმ ღამით იბლისმა თავისი ქვეშევრდომი ჯინები შეკრიბა. ჰკითხეს: ჩვენო სიხარულო, რამ შეგაშფოთაო? მიუგო: ვაი თქვენდა! ღამე ჩამოწვა თუ არა, იმ დროიდან აქამდე, მიწისა და ზეცის ვითარება სხვაგვარად მიჩანს. უეჭველია, დედამიწაზე რაღაც ისეთი მოხდა, რისი მსგავსიც ისა იბნ მარიამის (იესო ქრისტეს) შობის შემდგომ აღარ მომხდარა. ახლავე წადით და გაიგეთ, რაც მოხდაო. ჯინები დაიფანტნენ, მერე კი, როცა მობრუნდნენ, განაცხადეს, ახალი არაფერი შეგვიმჩნევიაო. იბლისს უთქვამს: როგორც ჩანს, ამ საქმეს თვითონ უნდა მივხედოო. ძებნა დაიწყო და ლამის მთელი დედამიწა გადაჩხრიკა, ვიდრე ბოლოს ალ-ჰარამს - წმინდათაწმინდა მექას არ მიადგა, რომლისთვისაც ანგელოზებს წრე შემოერტყათ. ალ-ჰარამში შეღწევას შეეცადა, მაგრამ ანგელოზებმა არ დაანებეს, უყვირეს და გზა გადაუჭრეს. მაშინ ჰირას გამოქვაბულისაკენ გასწია, ბეღურად იქცა და იქ შეფრენას ლამობდა, რომ ანგელოზმა ჯიბრაილმა დაუძახა: აქედან გასწი, ღვთის წყალობას მოცილებულოო. იბლისმა უთხრა: ო, ჯიბრაილ, რაღაც მინდა გკითხოო. მიუგო: რა გინდაო? ჰკითხა: წუხელს აქეთ ახალი რა მოხდაო? მიუგო: მუჰამადი დაიბადაო. იბლისმა ჰკითხა: მისგან სარგებელს თუ ვნახავ რამესო? მიუგო: არაო. ჰკითხა: მისი თემისგანო? - დიახო. იბლისმა რომ ეს გაიგონა, წამოიძახა: მაშინ ძალიან ბედნიერი და კმაყოფილი ვარო."" ამ ყაიდის გადმოცემები მრავლადაა, თუმცა ჩვენ მათზე აღარ შევჩერდებით. ამ გადმოცემებიდან ისე გამოდის, რომ მუჰამადი ქალაქ მექაში დაიბადა, მაგრამ მისი დაბადების ადგილის შესახებაც მატიანეთა ავტორებს სხვადასხვა აზრი აქვთ. ზოგი მათგანი მოციქულის დაბადების ადგილად მუჰამად იბნ იუსუფ ას-საკიფის სახლზე მიუთითებს და ამბობს, ეს სწორედ ის სახლია, რომელიც ას-საფას ახლოს მდებარეობდა, შემდგომში ხალიფა ჰარუნ არ-რაშიდის მეუღლემ, საიდა ზუბაიდამ შეისყიდა და მის ადგილას მეჩეთი ააგო. ზოგი მემატიანე კი ამბობს, რომ მუჰამადი ბანი ჰაშიმის ქოხში დაიბადა. არსებობს კიდევ სხვა მოსაზრებებიც, რომელსაც მუსლიმი მეცნიერები არასარწმუნოდ მიიჩნევენ. "
ჩუქება
