ბრძოლა
რას დაგვაკლებს ჩვენ მტარვალი,
თუ გვექნება ერთი პირი,
შევასრულოთ ჩვენი ვალი,
რომ არ ვნახოთ გასაჭირი.
შევაბრუნოთ ქვეყნის ჩარხი,
წინ წავიდეთ საბრძოლველად,
ან დავიხსნათ ჩვენი ხალხი,
ანუ გავწყდეთ ბრძოლის ველად.
დე, გაიგონ კიდით კიდე -
არ ვღალატობთ სიმართლესა,
სიბნელიდან გამოვიდეთ,
მივეგებოთ სინათლესა.
არ შეშინდეთ, გინდ გაწამონ,
ვით იესო ნელა-ნელა,
გინდ შორიდან დაგანახონ
ჯალათური სახრჩობელა.
მაინც მედგრად გასწით წინა,
არ შეუკრთეთ შხამ-სამსალას...
ძირს ჯალათი - მტარვალთ ბინა -
გაუმარჯოს მუშის ძალას!
1906 წელი
ჩუქება
