I. 20 რიცხვში მომხდარი ამბავი
აქ მოთხრობილია, როგორ დაღუპა
ტყუპმა საქმისმწარმოებელი
იმ დროს, როცა ხალხი ერთი სამსახურიდან მეორეში გარბი-გამორბოდა, ამხანაგი კოროტკოვი ასანთმასალმთავარცენტრ ბაზაში (ასანთის მასალათა მთავარ ცენტრალურ ბაზაში) მთელი 11 თვე უცვლელად მსახურობდა საქმისმწარმოებლის საშტატო თანამდებობაზე.
ასანთმასალაში მოკალათებულმა, წყნარმა, ქერათმიანმა კოროტკოვმა გონებიდან სამუდამოდ ამოიგდო აზრი, რომ ამქვეყნად არსებობდა ეგრეთ წოდებული ბედის უკუღმართობანი. ამის ნაცვლად ჩაინერგა რწმენა, რომ ამ ბაზაში იმსახურებდა დედამიწაზე სიცოცხლის დასრულებამდე, მაგრამ ყოველივე სხვაგვარად წარიმართა.
1921 წლის 20 სექტემბერს ასანთმასალის მოლარემ საძაგელი ყურებიანი ქუდი დაიხურა. პორტფელში ზოლებიანი ასიგნობა ჩაიდო და წავიდა. ეს იყო ღამის 11 საათზე.
ნაშუადღევს, ხუთის ნახევარზე, მთლად გალუმპული დაბრუნდა, ქუდიდან წყალი დაფერთხა, მაგიდაზე დადო, ზედ პორტფელი ჩამოდო და თქვა:
– ბატონებო, ზედახორას ნუ გამართავთ.
მერე, რატომღაც მაგიდის უჯრა ამოქექა და ოთახიდან გავიდა. თხუთმეტი წუთის შემდეგ კი დიდი, კისერმოგრეხილი მკვდარი ქათამი მოიტანა, პორტფელზე დადო, მარჯვენა ხელი დააყრდნო და წარმოთქვა:
– ფული არ იქნება!
– ხვალ? – ერთხმად შეჰყვირეს ქალებმა.
– არა, – თავი გააქნია მოლარემ, – არც ხვალ იქნება და არც ზეგ. ბატონებო, ზედახორას ნუ გამართავთ, თორემ მაგიდას გადამიბრუნებთ.
– რაო? – შესძახა ყველამ, მათ შორის, მიამიტმა კოროტკოვმაც.
– ამხანაგებო! – ტირილნარევი ხმით ამღერდა მოლარე და კოროტკოვი იდაყვით მოიცილა, – გთხოვთ!
– ეს როგორ შეიძლება? – ყველა ყვიროდა, ყველაზე ხმამაღლა კი კომიკოსი კოროტკოვი.
– აი, ნახეთ, – ჩახრინწული ხმით თქვა მოლარემ, პორტფელიდან ასიგნობა ამოიღო და კოროტკოვს აჩვენა.
იმ ადგილას, სადაც მოლარე ჭუჭყიან ფრჩხილს უსვამდა, წითელი მელნით ირიბად იყო წარწერილი:
„გაეცით. სუბოტნიკოვის ნაცვლად – სენატი“.
უფრო ქვემოთ იისფერი მელნით ეწერა:
„ფული არ არის. ივანოვის ნაცვლად – სმირნოვი“.
– რაო? – მარტო კოროტკოვმა შეჰყვირა, ხოლო დანარჩენები მოლარეს ხვნეშით მიესივნენ.
– ოჰ, ღმერთო ჩემო! – აწუწუნდა დაბნეული მოლარე, – მე რა შუაში ვარ? ღმერთო ჩემო!
მერე ასიგნობა პორტფელში ფაცაფუცით ჩატენა, ქუდი დაიხურა, პორტფელი იღლიაში ამოიჩარა, თავი გაიქნ-გამოიქნია, შეჰყვირა, გეთაყვა, გამატარეთო, ცოცხალი კედელი გაარღვია და კარში გაუჩინარდა.
მოლარეს წრიპინით გაედევნა გაფითრებული რეგისტრატორი ქალი. მაღალქუსლიანი ფეხსაცმელი ეცვა. მარცხენა წვეტიანი ქუსლი ზედ კართან ღრაჭუნით მოსძვრა. ქალი შეტორტმანდა, ფეხი ასწია და ფეხსაცმელი გაიძრო.
ფეხსაცმელგაძრობილი ქალი და დანარჩენები, მათ შორის, კოროტკოვიც, ოთახში დარჩნენ.
ჩუქება
