1. შესავალი. ბედნიერი ოჯახი
ჩვენს წარმოდგენაში როგორია ბედნიერი ოჯახი?
ადამიანური წარმოდგენით, ეს არის მოსიყვარულე ცოლ-ქმარი, რომელთაც ჰყავთ შვილები; ქმარი დადის სამსახურში, ცოლი უვლის ოჯახს, შვილები ბეჯითად სწავლობენ; საღამოობით მთელი ოჯახი ერთად იკრიბება და ყველა ცდილობს ერთმანეთს ასიამოვნოს. უფროსი თაობა – ბებიები და ბაბუები ხარობენ შვილიშვილებით. ამ ადამიანებს ყველაფერი საერთო აქვთ – ჭირიც და სიხარულიც.
დაქორწინებისას ადამიანთა უმეტესობა სწორედ ასეთი ოჯახის შექმნაზე ოცნებობს. სამწუხაროდ, გადის დრო და ახლად დაქორწინებულნი თანდათან სხვათაგან აღარ განირჩევიან: პირველი სიხარული და აღტაცება ყოველდღიურ ერთფეროვნებასთან შეხებით ნელ-ნელა ქრება, პირველი უთანხმოებაც იჩენს თავს და ადამიანები უხალისოდ ეწევიან მძიმე ოჯახურ უღელს.
ჩვენი ღრმა რწმენით, თუ ცოლქმრული კავშირის საფუძველი ცოცხალი ქრისტიანული რწმენაა, რაც ცხოვრების ეკლესიურ წესში უნდა გამოიხატოს, არა მხოლოდ ოჯახური ტვირთის მსუბუქად ტარებაა შესაძლებელი, არამედ იმ პირველი სიხარულის ხელშეუხებლად შენარჩუნება, რომლითაც გასხივოსნებულია ქორწინების პირველი დღე.
მიუხედავად ღვთისგან განდგომის მრავალი ათეული წლისა, ჩვენს ქვეყანაში ასეთი ოჯახები არსებობდნენ და დღესაც არსებობენ – მართალია, ცოტა, მაგრამ მაინც არიან ცოლ-ქმარნი, რომელთაც თანაცხოვრების მრავალი წლის მანძილზე ერთმანეთისთვის ერთი ცუდი სიტყვაც არ უკადრებიათ. არაეკლესიურობის მიუხედავად, ასეთი ბედნიერი ოჯახების არსებობა ღვთის წყალობაა. მაგრამ, სამწუხაროდ, ასეთი რამ იშვიათი გამონაკლისია. ქრისტიანობის შინაგან, გენეტიკურ ცოდნასთან ერთად ოჯახური სიწმინდის წარმატების საწინდარი გააზრებული მართლმადიდებლური აღმსარებლობა და ცხოვრების ეკლესიური წესია.
მეუღლეთა დიდი ნაწილი ხშირად უცოდინარობის გამო სცოდავს როგორც ღმერთის, ისე ერთმანეთისა და შვილების წინაშე. ამ მძიმე ხარვეზის გამოსწორება – უცოდინარობის აღმოფხვრა (როდესაც საქმე ეხება უმარტივეს ქრისტიანულ და, კერძოდ, ოჯახურ უფლება-მოვალეობებს), ჩვენი უპირველესი საზრუნავია.
ღმერთმა დალოცოს ყველა ოჯახი და გაუხსნას ყველა მეუღლეს გონებისა და გულის კარი ღვთაებრივი ცოდნის მისაღებად ოჯახის შესახებ, რომელიც გადმოცემულია ბიბლიაში წმინდა მამებისეული განმარტებების მიხედვით და აგრეთვე იმ წმინდანთა ცხოვრებაში, რომელთაც საკუთარ ოჯახზე გადაიტანეს დიდი განსაცდელი, მაგრამ მორჩილად დაითმინეს, ღვთის დიდი წყალობა დაიმსახურეს, რის გამოც ოჯახური სიწმინდის მფარველებად ითვლებიან: წმინდა გური, აბიბოსი და სამონა, წმინდა სოფიო, პისტი, აღაპი და ელპიტე (სოფიო, ვერა, ნადეჟდა და ლიუბოვი), წმინდა რუთი, წმინდა მართალი იობი, წმინდა დიდმოწამე ესტატე პლაკიდა, წმინდა მოწყალე ფილარეტი, წმინდა ეპისკოპოსი გაბრიელ ქიქოძე და სხვანი.
ჩუქება
