თავი I - თანამგზავრი დარწმუნებული ვარ, სავსებით რეალური ამბავი უდევს საფუძვლად საყოველთაოდ ცნობილ ანეკდოტს ახალგაზრდა მწერლის შესახებ, რომელმაც, ყველაზე უფრო სკეპტიკური რედაქტორების გულის მოსაგებად, თავის ნაწარმოებს ორიგინალური დასაწყისი მოუგონა სიტყვებით: „ეშმაკმა დალახვროს! - შესძახა გრაფინიამ“.
უცნაურია, მაგრამ ჩემი ამბავიც ასე იწყება. იმ განსხვავებით, რომ ქალი, რომელმაც ეს ფრაზა წამოიძახა, ჰერცოგინია არ გახლდათ.
ივნისის დამდეგი იყო. მმე მოვრჩი ჩემს საქმეებს პარიზში და დილის რეისით ვბრუნდებოდი ლონდონში, სადაც ჩემს მეგობართან, ერკიულ პუაროსთან ერთად ვცხოვრობდი. ეერკიულ პუარო ბელგიელი დეტექტივი გახლდათ, რომელიც იმ პერიოდში საქმეებს ჩამოშორდა და აღარ მუშაობდა გამომძიებლად.
კალეს ექსპრესი, ფაქტობრივად, ცარიელი იყო, ჩემთან ერთად კუპეში კი ერთადერთი მგზავრი იმყოფებოდა. სასტუმრო ნაჩქარევად დავტოვე და ამიტომ გაფაციცებით ვამოწმებდი ჩემს ბარგს, როდესაც მატარებელი დაიძრა. ამ მომენტამდე, პრაქტიკულად, ვერც ვამჩნევდი ჩემს თანამგზავრს, მაგრამ მოულოდნელად ჩემი ყურადღება იმით მიიპყრო, რომ წამოხტა, ჩამოსწია ფანჯარა და თავი გარეთ გაყო. რამდენიმე წამში უკან დაიხია და მოკლე, ხმამაღალი შეძახილი აღმოხდა: „ეშმაკმა დალახვროს!“
მე ძველი ყაიდის ადამიანი გახლავართ და ვთვლი, რომ ქალი ქალური უნდა იყოს. ვერ ვიტან ვულგარული მანერების მქონე თანამედროვე ნევროზიან გოგონებს, ბუხარივით რომ აბოლებენ და ისეთ სიტყვებს იყენებენ საუბარში, ბილინგსგეიტელ თევზის გამყიდველ ქალებსაც რომ გააწითლებს სირცხვილისგან.
ოდნავ წარბშეხრილმა შევათვალიერე ამ ქალის ქარაფშუტობის გამომხატველი მომხიბლავი სახე, რომელიც პატარა წითელ ქუდში ჰქონდა გახვეული. ქუდის ორივე მხარეს ჩამოშლილი სქელი, შავი კულულები ყურებს უფარავდა. ჩემი შეფასებით თვრამეტიოდე წლისა იქნებოდა, თუმცა სახეს პუდრი უფარავდა, ტუჩებზე კი წარმოუდგენლად წითელი პომადა ესვა.
ოდნავადაც არ შეცბუნებულა, თვალი თვალში გამიყარა და მრავლისმთქმელი მზერა მესროლა.
- ოჰ, ღმერთო, ჩვენ ეს კეთილი ჯენტლმენი შოკში ჩაგვიგდია! - მიმართა მან წარმოსახვით აუდიტორიას, - ბოდიშს ვიხდი ჩემი ლექსიკის გამო! ქალისთვის ძალიან შეუფერებელია, რაც წამომცდა, მაგრამ საკმარისი მიზეზი მაქვს, მეთქვა ის, რაც ვთქვი! იცით, რომ მე ჩემი ერთადერთი და დავკარგე?
- მართლა? - თავაზიანად ვთქვი მე, - რა სამწუხაროა.
- ის გვკიცხავს! - განაგრძობდა ახალგაზრდა ქალი, - ის მკაცრად გვკიცხავს მეც და ჩემს დასაც, მმაგრამ ეს უსამართლობაა, მას ხომ ჩემი და არც უნახავს!
შეპასუხება დავაპირე, მაგრამ ახალგაზრდა ქალმა საუბრის დაწყების საშუალება არ მომცა.
- სიტყვა არ დაძრათ! არავის ვუყვარვარ! წავალ უდაბნოში და ჭიებს შევჭამ! სასოწარკვეთილი ვარ!
მან თავი ფრანგულ კომიქსებში ჩარგო, მაგრამ ძალიან მალე შევნიშნე, რომ გოგონა მალულად მითვალთვალებდა. თავი ვერ შევიკავე და გავიღიმე, მან კი იმავე წამს მოისროლა კომიქსი და მხიარულად გაიცინა.
- მაშინვე მივხვდი, რომ არც ისეთი ბუზღუნა ბრძანდებით, როგორიც ერთი შეხედვით ჩანხართ, - შესძახა მან და გაიცინა. მ
მისი სიცილი იმდენად გადამდები იყო, რომ თავი ვერ შევიკავე და მეც შევუერთდი, თუმცა სიტყვა „ბუზღუნა“ ოდნავ მაინც მიღრღნიდა გულს.
- აი, ჩვენ უკვე მეგობრები ვართ! - განაცხადა კადნიერმა გოგონამ, - მითხარით, რომ წუხხართ ჩემი დის...
- ძალიან ვწუხვარ!
- კარგი ბიჭი!
- ნება მიბოძეთ, დავასრულო სათქმელი. ჩემს სათქმელს იმასაც დავამატებდი, რომ მიუხედავად ჩემი მწუხარებისა, მის არყოფნას მაინცდამაინც არ განვიცდი, - ვთქვი და ოდნავ დავუკარი თავი თანამოსაუბრეს.
მაგრამ უცნაურმა ქალიშვილმა წარბი შეჭმუხნა და თავი გააქნია.
- საკმარისია! ის უფრო მომწონს, როგორ გამოხატავთ კეთილშობილურ აღშფოთებას იმის აღსანიშნავად, რომ სხვა წრეს ვეკუთვნით. ამ შემთხვევაში, თქვენ მართალი ხართ, მაგრამ გაითვალისწინეთ, რომ თანამედროვე საზოგადოებაში ყველაფერი ძალზე რთულად და არაერთმნიშვნელოვნადაა მოწყობილი. ყველას როდი შეუძლია საშუალო შეძლებისა და წარმომავლობის ქალის ჰერცოგის მეუღლისგან გარჩევა. აჰა! როგორც ჩანს, ამჯერადაც შოკი მოგგვარეთ! ნეტავ, საერთოდ, საიდან გამოტყვრა თქვენისთანა წარღვნამდელი ადამიანი. ისე, მომწონს კიდეც, ასეთი რომ ხართ. თქვენზე უარეს სნობთანაც კი შემიძლია საერთო ენის გამონახვა, მხოლოდ თავხედ ადამიანებს ვერ ვიტან. უბრალოდ, წყობიდან გამოვყავარ მასეთ ტიპებს!
გოგონამ თავდაჯერებულად გააქნია თავი.
- ნეტავ როგორ გამოიყურებით, როდესაც წყობიდან ხართ გამოსული, - ღიმილით ვთქვი მე.
- ოჰ, ნამდვილი ავსული ვარ მაგ დროს! ყველაზე მოულოდნელი რამ შემიძლია ჩავიდინო. ერთხელ კინაღამ სახეში გავულაწუნე ერთ ტიპს. ისე, კი იმსახურებდა.
- გთხოვთ, ჩემი თანდასწრებით არასდროს გამოხვიდეთ წყობიდან, - შევევედრე მე.
- გპირდებით. სხვათა შორის, თქვენ თავიდანვე მომეწონეთ. ჯერ მეტისმეტად დაღვრემილი მეჩვენეთ, ვერც კი ვიფიქრებდი, თუ ასეთ საინტერესო საუბარს გავაბამდით.
- შემცდარხართ. ახლა კი მომიყევით რაიმე თქვენ შესახებ.
- რა მოგიყვეთ? მსახიობი ვარ. არა, არა ისეთი, როგორიც
ჩუქება
