სიტყვები - სიყვარულის თვალები
***
***
ადამიანმა
მწვერვალი დაამშვენა
როგორც ჯვარმა გუმბათი.
***
რაც უფრო პატარავდებიან
მით უფრო ამშვენებენ ქვეყანას
ტყუპები-სანთელი და ფანქარი.
***
ცას უახლოვდება
და როგორც არასოდეს
ესმის ფიქრი დედამიწისა.
***
შეყვარებული მტრედებივით
მდელოზე მოჩანან ქვები.
***
მგზავრი ჰორიზონტზე
როგორც დროშა სიყვარულისა.
***
საიდუმლო წუთისოფლისა-
ტაძრის ჩრდილივით
სევდიანი და ყვავილოვანი.
***
ორიოდე მკითხველთან ერთად
ძველ ნავზე მოვთავსდებით
და სივრცეს მივენდობით.
***
ორივე ბედნიერი-
სიყვარულის
წიგნის ყდებივით.
***
მდინარეს შეხედე და გაიგებ
რა უთხრა
ღრუბელმა ღრუბელს.
***
გადარჩა ერთი ხე
და ერთი ფრინველი
და მზე ამოვიდა.
***
ძმებმა იჩხუბეს და კედელზე
მშობლების სურათს
თითქოს ნისლი გადაეფარაო.
***
ათასი სიმღერა-
როგორც ერთი საგალობელი.
ჩუქება
