ხარისხის კულტი
რაც უფრო მაღალია მომხმარებლისთვის შეთავაზებული პროდუქტის ხარისხი, მით უფრო მაღალია მისი ლოიალურობა შენს მიმართ.სწორედ ეს უკანასკნელი განსაზღვრავს ნებისმიერი ორგანიზაციის გრძელვადიანი სიცოცხლისუნარიანობის დონეს.
ოთხმოცდაათიანი წლების მეორე ნახევარში, საქართველოში, როდესაც რამდენიმე მეგობარმა გლობალური ტექნოლოგიების შემოტანა გადაწყვიტა, ჯერ კიდევ ბევრს ძალიან ბუნდოვანი წარმოდგენა ჰქონდა იმაზე, თუ რა იყო კომპიუტერი, ან ინფორმაციული ტექნოლოგია და თანაც გლობალური. სწორედ ამ დეფიციტის აღმოფხვრა გახდა მათი პირველი მისია, რომელიც სულ ერთ წელიწადში ბიზნესის ახალ ეტაპზე გადაყვანისთვის საჭირო კაპიტალის მობილიზაციის წყარო გახდა. ახალგაზრდებმა ორგანიზაცია გაუკეთეს კომპიუტერის შემსწავლელ კურსებს, რომელმაც მათ საშუალება მისცა პირველი ასი ათასი გაეკეთებინათ. სწორედ ასე დაიდო დედაქალაქის ცენტრში, წყნარ და ლამაზ ადგილას ბინა კომპანიამ ამბიციური სახელწოდებით “გაერთიანებული გლობალური ტექნოლოგიები”.
პიკის საათი. დედაქალაქში ჭავჭავაძის პროსპექტი ხმაურს და მანქანების გამონაბოლქვს მიაქვს, რომელიც ბლანტად დასდებია ქალაქს და ამოსუნთქვის საშუალებას არ აძლევს. ერთ-ერთ შესახვევში სულ ოციოდე ნაბიჯს გადადგამ და ხმაური ქრება, სუნთქვაც ადვილი და სასიამოვნო ხდება. მდინარე ვერეს ხეობას მიჰყვება მზერა და ერთბაშად იქმნება სივრცის შეგრძნება, რომელიც გიბიძგებს, რომ დიდ და მასშტაბურ საქმეებზე იფიქრო. თითქოს უფსკრულიდან ამომართული, ნაწილობრივ უფუნქციოდ დარჩენილი შენობის სართულნახევარი შორიდანვე იპყრობს ყურადღებას, თეთრად შეღებილი რკინის დარაბების უმეტესობა დაკეტილია. პირველივე შეხედვით იგრძნობ, რომ აქ, ამ დახურული დარაბების იქით რაღაც განსხვავებული მოვლენები ხდება. როგორც კი შენობაში შეხვალ, თვალში გეცემა წყნარ ფერებში, სიმშვიდის მომგვრელი განათებით, გემოვნებით მოწყობილი მისაღები.
ჩუქება
