ფორდ მუსტანგი

მეოცე   საუკუნის   საავტომობილო

   ისტორიის ყველაზე წარმატებული პროექტი

60-იან წლებში ამერიკა გატაცებული იყო სპორტული მანქანებით. იმ დროის მრავალი სიმღერაც მიეძღვნა ამ მოდელების ქება-დიდებას... ფორდისთვის სამწუხაროდ კი ამ ავტომობილთა უმრავლესობას “ჯენერალ მოტორსი” და ევროპელები აწარმოებდნენ...

ამ პერიოდში “ფორდი” დაღმავალი გზით მიექანებოდა... ბევრი ექსპერტი  მას დაღუპვასაც კი უწინასწარმეტყველებდა და აი, ლი იაკოკას გენიალურმა გადაწყვეტილებამ კორპორაციის ბედი დიამეტრულად შემოატრიალა...

საბაზრო სიტუაციის შეცვლის იმედით კორპორაციამ გადაწყვიტა ისეთი სპორტული მოდელის შემუშავება, რომელიც მყიდველთა განწყობას    სადემონსტრაციო დარბაზებიდანვე მოიპოვებდა...

მოდელის შემუშავების ტრადიციული მეთოდის მიხედვით, ხელმძღვანელობას თავდაპირველად საკონსტრუქტორო განყოფილებაში ინსტრუქციები უნდა გაეგზავნა - შეექმნათ მანქანა, რომელიც შეძლებდა ბაზარზე ლიდერის პოზიციის დაკავებას...

ამის შემდეგ, თითოეული კონსტრუქტორი დახატავდა რამდენიმე ახლებური სპორტული მანქანის სქემას შესაბამისი ძრავითა და ტრანსმისიით, რამდენიმე კვირის შემდეგ კი, ხელმძღვანელობა წარმოდგენილი პროექტებიდან საუკეთესოს ამოარჩევდა...

შერჩეული პროექტი განსახილველად გადაეცემოდა მარკეტინგული კვლევის განყოფილებას. მკვლევარები გაითვალისწინებდნენ პოტენციური მყიდველების თითოეულ შენიშვნას, შთაბეჭდილებებს, შეფასებებსა და შედარებებს სხვა კონკურენტ მოდელებთან მიმართებაში. ბოლოს დაითვლიდნენ ხარჯებს და სასურველი მოგებიდან გამომდინარე დაადგენდნენ ფასს...

იაკოკა მარკეტოლოგი იყო და არა ფინანსისტი. მან იცოდა, რომ ახალი სპორტული ავტომანქანა შეძლებდა მომხმარებელთა გულების მოგებას, მაგრამ, როგორც სხვა ძვირადღირებული ბრენდების შემთხვევაში, მათი უდიდესი ნაწილი მის შეძენას ვერ შეძლებდა... ბაზარი კი დაბალფასიანი სპორტული მანქანების დეფიციტს განიცდიდა, ვინაიდან სპორტული მანქანის წარმოება, საერთოდ, მაღალ თვითღირებულებასთან იყო დაკავშირებული...

მარკეტინგულმა კვლევებმა აჩვენა, რომ მომხმარებელთა უმრავლესობისთვის სპორტულ მანქანაში მთავარი იყო სტილი და არა ძვირადღირებული ძრავი ადეკვატური სპორტული ტრანსმისიით. ბაზარზე უბრალოდ არ არსებობდა დაბალფასიანი მოდელი სტილიზებული თასისმაგვარი საჯდომებით, „დამნაშავის გარეგნობითა“ და უჩვეულო საბურავებით (სპორტული მანქანების ბაზარი ძირითადად დაბალფასიან „ფალკონსა“ და „ჯენერალ მო- ტორსის“ ძვირადღირებულ „კორვეტეს“ ეჭირათ).

1964 წლის აპრილში „ფორდმა“ ბაზარზე სპორტული მოდელი „მუსტანგი“ წარმოადგინა, რომლის ფასი იყო 2368 დოლარი და რომელმაც პირველივე წელს გაყიდვებით კორპორაციულ რეკორდს გადააჭარბა. პირველი ორი წლის განმავლობაში სუფთა მოგებამ გაყიდვიდან შეადგინა 1,1 მილიარდი. „ფორდმა“, ამ მაჩვენებლით აჯობა ყველა კონკურენტ ნამდვილ სპორტულ ავტომანქანას...