ყველაზე მნიშვნელოვანი შეხვედრა
თუ წელიწადში ერთხელ მაინც კომპანიის უმაღლესი მენეჯმენტი ერთ ან რამდენიმე შეხვედრას მოაწყობს ორგანიზაციის მიზნის ჩამოსაყალიბებლად/განსახილველად, ამით არამარტო მიზანი ექნება ორგანიზაციას (შეგიძლიათ იხილოთ ინსაითი: მიზნის როლი ), არამედ მმართველი გუნდიც ბევრად უფრო შეიკვრება.
ორგანიზაციის წამყვან პირებს ხშირად უწევთ შეხვედრა, მსჯელობა და გადაწყვეტილების მიღება, მაგრამ საკითხები იმდენად ოპერაციული და ლოკალურია ხოლმე, მენეჯერებს არ უჩნდებათ განცდა, რომ ერთი გუნდის წევრები არიან და ერთ ნავში სხედან. რაც არ უნდა მარტივად თანხმდებოდნენ მიმდინარე საკითხებზე თითქმის შეუძლებელია, ასეთი შეხვედრის გარეშე გააჩნდეთ მსგავსი შეხედულება მიზანზე. ბევრს საერთოდ არც ექნება ამაზე ნაფიქრი, ნაწილს ბუნდოვანი და გაუაზრებელი წარმოდგენა ექნება ამ საკითხზე.
მიზანზე შეხვედრა კი აერთიანებს მენეჯმენტს, ისინი ექცევიან მიღებული დანიშნულების გავლენის ქვეშ, ყველა ერთი მიზნისკენ იწყებს მოძრაობას, მათ უკეთ ესმით ერთმანეთის და ამის შემდგომ ჩატარებული თითოეული შეხვედრა გაცილებით ეფექტიანია. ეს კი აისახება ყოველ მოქმედებაში, ნაბიჯში, გადაწყვეტილებაში. ყალიბდება ერთი მთლიანი ორგანიზმი.
შეხვედრის ორგანიზებისათვის არ არის საჭირო დიდი მომზადება, უბრალოდ, სასურველია თავიდან რამდენიმე (2-3) ალტერნატივა დანიშნულებისა, რომლებზეც იმსჯელებენ წევრები. ხშირად სრულიად ახალი დანიშნულება ყალიბდება. მზად იყავით, რომ ამ თემაზე მსჯელობა საკმაოდ რთულია, კამათი რამდენიმე საათს შეიძლება გაგრძელდეს, მთავარია გენერალური დირექტორის ან სხვა ავტორიტეტის მიერ არ მოხდეს სხვების აზრების იგნორირება და საკუთარი მოსაზრების თავზე მოხვევა. შეიძლება პირველივე შეხვედრაზე ვერც შეჯერდეთ, მაგრამ აუცილებლად დაინახავთ ცვლილებას მონაწილეთა თვალებში, ქცევებში, დამოკიდებულებაში, შეხვედრებსა და მიდგომებში.
