ლიტერატურული გაზეთი #203

პაატა ნაცვლიშვილი - რკინის ბუშტები
 
 
1, 2, 3, 4, 5, 6, 7 და პირიქით
წიგნებისთვის: „ მოციმციმე არითმია", „ ბორბლები", „ პაატაფიზიკური რეფ-ლექსები"
 
ერთი, ორი, სამი, ოთხი, ხუთი, ექვსი, შვიდი...
შვიდფრად ბრწყინავს ცისარტყელა – მოზიდული მშვილდი.
ბრიტანეთის ტახტისათვის ორი პრინცი შვი, დი!
სანადიროდ წასულიყვნენ გურჯანელნი შვიდნი,
თეთრად ჰყვავის ალუბალი, ყვითლად ჰყვავის შვინდი,
„ ხიდან ხეზე"... „ გაზაფხულის საღამოა მშვიდი"...
ერთი, ორი, სამი, ოთხი, ხუთი, ექვსი, შვიდი...
 
შვიდი, ექვსი, ხუთი, ოთხი, სამი, ორი, ერთი...
დაეტაკა თვალებს თეთრი მკერდის ორი კერტი,
პატარა პრინცს ესიზმრება დიდი ლეონ ვერთი,
ჯონ გლენისთვის ანთებულა ავსტრალიის პერთი,
სერთიფიკატს თხოულობენ, სერთიფიკატს, სერთი...
დამწერსაც და წამკითხველსაც შეგვეწიოს ღმერთი,
შვიდი, ექვსი, ხუთი, ოთხი, სამი, ორი, ერთი...
IV-V
 

თუ ამ სტერეოგრამას თვალებს გავუშტერებთ, რკინის ბუშტების სამგანზომილებიან გამოსახულებას დავინახავთ
 

 
ნატვრანი
წიგნებისთვის: „ სელფები", „ ანდაზები და აქანდაზები",
„ ბაბილონის გონდოლა", „ რიმეიქები და რიპეირები"

დაკიდებულან ზეცაში ბაღები სემირამიდის,
ღვინო-დუდუკი-ქალები ვინატრე, ჩემი რა მიდის!

გარდა ამ ტრადიციულის, მე კიდევ სამი რამ მინდა –
კვირაში სამჯერ ბაღებში მელოდეს სემირამიდა!

(ფორმითაც და შინაარსითაც)
თავხედური ლექსი
ანაბელ ლის
წიგნებისთვის: „ კენტავრები და წყვილტავრები", „ ქალები და ქალაქები",
„ (სი)ტყვია (სი)ტყვიაში", „ წიგნები"
შენ ხარ ჩემი და ედგარ პოს გამაერთიანებელი...
ჩვენი კოხტა წიგნებიდან გამო, ერთი, ანაბელ ლი!

ხარიხა
(2017 წლის 11 მაისი. „ რეალი"- „ ატლეტიკო")
წიგნებისთვის: „ ფეხბურთიერთობანი", „ სპორტლექსები",
„ თანხმოვ(ა)ნებანი", „ (სი)ტყვია (სი)ტყვიაში"

წამით უნდა დაივიწყო ამ ცხოვრების ხარახურა,
და გრიზმანიც დაივიწყო, აზანზარა ხარიხა რო!
ხარი უნდა ითამაშო, თუ გეტყვიან, – ხარი ხარო,
თუ გეტყვიან იხარეო, ვალდებული ხარ, იხარო!

პურის რიგში დაწერილი ლექსი
წიგნებისთვის: „ გველები და არაგველები", „ სელფები",
„ აპოლიტკორექტული ადრესები"

ხო გაქრა შუმერი, ხო გაქრა ეგვიპტე,
                    ხო გაქრა თრაკია ან მაკედონია,
ათასი წელია მას მერე გასული,
                    ან უფრო მეტია ან მაგოდენია,
როდემდე გინდა, რო იძახო, საწყალო,
                    არ მაქო პური და არ მაქო დენია,
ზოგისთვის აღდგომა და რენესანსია,
                    ზოგისთვის – წარღვნა და არმაგედონია.

შეძახილი
წიგნებისთვის: „ გველები და არაგველები", „ თანხმოვ(ა)ნებანი",
„ (სი)ტყვია (სი)ტყვიაში", „ პაატაფიზიკური რეფ-ლექსები"

თუ მოგკერძეს ურვა ურიცხვი რო,
თუ ცხოვრებამ დაგიფანტა ცხვარი,
ობლის კვერი თუ არ გამომცხვარა,
შენ მაინც არ ჩამოუშვა ცხვირი!

მაგნოლიის მონატრება
წიგნებისთვის: „ (სი)ტყვია (სი)ტყვიაში", „ ქალები და ქალაქები",
„ გველები და არაგველები", „ მაჯამანი"

რა ჩიტია? გვრიტი? არა. მტრედი? არა. მა გნოლია?
ყურადღებას ნუ მიაქცევ მაგის სიტყვებს, მაგ ნოლია!
სადაც იდგა, ისევ იქ დგას ჩვენი მოწმე მაგნოლია,
რომც ვერავინ ვერ მომაგნოს, შენ უნდა მომაგნო, ლია!
 
წარვედ წყალის პირს
წიგნებისთვის: „ (სი)ტყვია (სი)ტყვიაში", „ პაატაფიზიკური რეფ-ლექსები",
„ ბაბილონის გონდოლა"
როგორი მტკნარი ღამეა,
მტკვარიც რა მოკამკამეა,
ცას გულზე მთვარე ჰკიდია,
როგორც გონზაგას კამეა
 
მწირი
წიგნებისთვის: „ სელფები", „ აპოლიტკორექტული ადრესები",
„ პაატაფიზიკური რეფ-ლექსები"

— არა გრცხვენია,
რომ არ ეკუთვნი არც არანაირ უმცირესობას?!

— არა მრცხვენია,
რადგან ვეკუთვნი ყველაზე მცირეს – უმწირესობას!

უთავბოლო ლექსი
წიგნებისთვის: „ გველები და არაგველები", „ აპოლიტკორექტული ადრესები,
„ თანხმოვ(ა)ნებანი", „ (სი)ტყვია (სი)ტყვიაში"

აქეთ აფხაზი კითხულობს, იქით კითხულობს ლექსს ოსი,
ორივეს მოსწონს კაფია ჭინჭარაულის ლექსოსი.

ახლა „ მალბოროს" ეწევა, წინათ ნატრული „ ლუქსისა",
ადრე „ ჟიგულს" ვერ ეღირსა, ახლა გახედნა „ ლექსუსი".
თუ ამან ქაფი არ მოხსნა, ვერ ამოიღებს ლექს ისა...
თავად არ მესმის იდეა ამ უთავბოლო ლექსისა!
გზებზე სუფრის გადაფენა
წიგნებისთვის: „ გველები და არაგველები", „ აპოლიტკორექტული ადრესები,
„ თანხმოვ(ა)ნებანი", „ სუმბურები და კალამბურები"
ლაღობს იუბილარი, სიტყვას ამბობს თამადა,
იგივ ტოლუმბაში –
ერთხელ ამერიკაში... ორჯერ იტალიაში...
სამჯერ კოლუმბიაში!

დარღვეულია დროთა კავშირი
წიგნებისთვის: „ მოციმციმე არითმია", „ საკენკი",
„ პაატაფიზიკური რეფ-ლექსები"

ცა ირეკლება რუში,
წყალში ღრუბლები თვალე...
შენ არ მოკვდები გუშინ!
შენ უკვე მოკვდი ხვალე!
 
ვარაზისხევი-1972
წიგნებისთვის: „ ანდაზები და აქანდაზები", „ ბაბილონის გონდოლა",