ხსოვნის ნათელი ტომი III

"რამდენიმე წელი მაფორიაქებდა წუხილი, რომ ჩემი გარდაცვლილი მეგობრების ხსოვნისთვის მნიშვნელოვანი და ღირებული ვერაფერი გავაკეთე. პასუხისმგებლობისა და მოვალეობის მძიმე ტვირთი მოსვენებას მიკარგავდა; ბევრი ფიქრის შემდეგ "ხსოვნის ნათელის" იდეა გაჩნდა. ახლობლებს გავუზიარე; თითქმის ყველამ მომიწონა ჩანაფიქრი და რეალური მოქმედებაც დავიწყე. ბოლოს იმ დასკვნამდე მივედი, რომ მხოლოდ უახლოესი მეგობრებით შემოფარგვლა არ იქნებოდა სწორი და ასეც მოხდა: ამ სამტომეულში თავმოყრილ ადამიანებს ძირითადად მხატვრული ლიტერატურა აერთიანებთ ზოგიერთებს მხოლოდ ერთხელ შევხვედრივარ, რაც სამუდამოდ დამამახსოვრდა; ბევრს უბრალოდ ვიცნობდი, პატივისცემით ვიყავი გამსჭვალული და მეამაყებოდა მათთან ნაცნობობა; ბევრთან მჭიდრო ურთიერთობა მაკავშირებდა, ვმეგობრობდით და მრავალგზის გავლაღებულვართ მამაპაპური პურღვინის მადლით; წიგნში არიან ისეთებიც, რომლებთან არანაირი პირადი ურთიერთობა არ მქონია, მაგრამ დღემდე ვმეგობრობ მათ შვილებთან, შვილიშვილებთან, ოჯახის წევრებთან, ახლობლებთან და მეგობრებთან; ამ ადამიანების უმრავლესობამ და მათმა შემოქმედებამ წარუშლელი კვალი დატოვა ჩემს ცხოვრებაში ბევრი მათგანის ლექსებზე, მოთხრობებსა და რომანებზე გავიზარდე და დღემდე მომყვება სულის საგზლად უკვდავი შედევრები; ამდენად. მოკლედ რომ ვთქვათ, "ხსოვნის ნათელი" ეს არის ჩვენგან წასულთა მონატრებასიყვარულის, მათდამი პატივის მიგებისა და ვალმოხდის კრებულები. აქ შეხვდებით სხვადასხვა ასაკის შემოქმედებს, კლასიკოსებსაც და დამწყებ კალმოსნებსაც; სამწუხაროდ, ბევრ მათგანს ვერ დასცალდა შემოქმედებითი წინსვლა და სიცოცხლეშივე აღიარება... "ხსოვნის ნათელს" ანთოლოგიის პრეტენზია არა აქვს, თუმცა მაქსიმალურად დაკვირვებით და გემოვნებით შევარჩიეთ თითოეული ნაწარმოები; ზოგიერთი ავტორის გვარსახელი შეიძლება ბევრს ეუცხოვოს, უცნობიც იყოს მკითხველისთვის, მაგრამ დასავიწყებლად ვერ გავიმეტეთ... რა ნიშნითაც გავაერთიანეთ სამტომეულში წარმოდგენილი ავტორები, უკვე მოგახსენეთ და, აქედან გამომდინარე, ბუნებრივია, ყველა გარდაცვლილი მწერლის, ლიტერატორის თავმოყრა წარმოდგენილ გამოცემაში იმთავითვე გათვალისწინებული არ ყოფილა. სურვილის მიუხედავად, ამ პროექტის ხორცის შესხმას, ვერც შევძლებდით, რომ არა თბილისის მერიის სოციალური მომსახურებისა და კულტურის საქალაქო სამსახურის კეთილი ნება და მხარდაჭერა. გულწრფელი მადლობა აღნიშნული სამსახურის მესვეურებსა და ხელმძღვანელებს; ყველა იმ ადამიანს, ვინც მომიწონა იდეა, გულთან ახლოს მიიტანა პროექტის მნიშვნელობა და გარკვეული დახმარებაც გამიწია. მადლობა იმ საგამომცემლო ჯგუფს, რომელმაც რამდენიმე თვე კეთილსინდისიერად იმუშავა, რისი მკაფიო შედეგიც თვალსაჩინოა. "ხსოვნის ნათელში" ყველა ავტორი მეტნაკლები სოლიდურობით წარმოვადგინეთ; ვფიქრობ, ამითაც არის ეს გამოცემა საგულისხმო, მნიშვნელოვანი და გამორჩეული. გალაკტიონისეული "გულთა კავშირის" გარდა, როგორც ჩვენი პატრიარქი, ილია II აღნიშნავს, "არსებობს სულთა კავშირი. ჩვენმა ურთიერთობებმა უნდა გაგვაძლებინოს აქ ყოფნა"... " ელგუჯა მარღია