პროლოგი ოთხი. არ მოდის. არც პრიხოდი. არც ჯოკერი. ლაპარაკი მეზარება, არადა, ის კი მახსოვს, რომ თქვენ გიყვებით და სხვანაირად ჯობს. მოკლედ, გრძლად: ოთხი ვზივართ მოსაჯოკრად. წეღან პლანი მოვწიეთ, მაგრამ მგონი, ტრუხაა. ხოლო მოქმედება სოფელ მაკვანეთის ერთ-ერთ გადახურულში ხდება. განაპირა ზაფხულში. ქუხნას რომ წააგრძელებენ მონარჩენი სახურავით, უკედლოდ, ეგ არის გადახურული. არ მოდის პრიხოდი. გივიევიჩი ტყუილად იზელს კეფას. გივიევიჩს ორი თითი ხერხმა წააგლიჯა. დრუჟბამ. აჭარლებთან ერთად იყო მასალის ამბავში. შარშან. ახლა კეფას იზელს და იჭყანება. არადა, აქაურმა კეფიდან იცის. ცივი წყალიც გაცდა, კიშკებიც. ყველი, ქათამი, კიტრები. მე სამი წელია მაკვანეთში ვცხოვრობ. ქვრივ ბიცოლასთან. აქ ჩამოვიტანე მოლბერტები. თბილისში არც სამსახური მაქვს, არც მუზები მომდის. ისე ოთხი თაობა თბილისელი ვარ. დაბადებით ბათუმში დავიბადე. ექვსი წელი ჩემები აქ ცხოვრობდნენ. მაკვანეთში. რაღაც მამაჩემს საქმე აეჭრა და. ჰოდა, აქ ან დავლევ, ან მოვწევ და მერე ნაძვების ბირჟაზე დავჯდები. კვირაობით ვხატავ. მანამდე ნაშების ამბებს მაყოლებენ. ამოიწურა ეს ნაშებიც და ტყუილების მოფიქრებაც მაგრად მეზარება. საერთოდ, გერმანიაში და ვაფშე, ახლა, ამწუთას ჯოკრის პონტიდან წასვლა მინდა. გავალ, შევხედავ, როგორ წველის მარეხი ბიცოლა ძროხას. იქვე, მომპალ ბოძს მივეყუდები, მოვწევ, ნახშირისფერ ბუზებს მოვიგერიებ, გადავაფურთხებ. ძროხა შემხედავს. მეც შევხედავ. სახეზეც. გაფუჭებულ ცურზეც. ოდესმე, სადმე, სოფელში, საძროხის შესასვლელს მიყრდნობილი წველის პროცესს მიშტერებიხართ? სამყაროს მთავარი ჰიპნოზია. რიჰარდ ბერგის დამსამარებელი. სხვებისაც. მით უფრო, თუ ან ნასვამი ხარ, ან რამე მსგავსი. და მაკვანეთში ცხოვრობ. დროებით. მხატვარი. წარუმატებელი, მაგრამ ნიჭიერი. ნიჭიერი, მაგრამ ზარმაცი. ზარმაცი, მაგრამ პერსპექტიული. პერსპექტიული, მაგრამ უიღბლო. უიღბლო, მაგრამ ჯოკერი რომ მოვიდა? სწორედ ახლა, ადგომას რომ ვაპირებდი. ადგომას და წასვლას.
უცებ, წკაპ და ერთი ჩემს ფეხებთან დავარდა. ფრთხილად დავხედე, დაკვირვებით. შეუმჩნევლად ირხეოდა და მალე გაშეშდა. მკვდარია. სიმართლე გითხრათ, გამიხარდა მისი სიკვდილი. ყოველთვის საშინლად მძულდა. გამორჩეულად. და აქაურობაც საშინლად მომბეზრდა. ხვალვე თბილისში წავალ. საბუთებზე ვიჩალიჩებ. გერმანიის საბუთებზე. ამ ნახატებსაც წავიღებ და რამეს იქაც დავამატებ. აბა, თქვენ რა გეგონათ?
ჩუქება
