დები ბრონტეები
შარლოტა, ემილი და ენ ბრონტეებმა - ერთი ოჯახის შვილმა მწერალმა ქალებმა თვალსაჩინო ადგილი დაიმკვიდრეს არა მარტო ინგლისურ, არამედ მსოფლიო ლიტერატურაში. ხანმოკლე სიცოცხლის მიუხედავად, თითოეულმა, მრავალი თაობისთვის საყვარელი ნაწარმოებები - „ჯეინ ეარი“ (შარლოტამ), „ქარიშხლიანი უღელტეხილი“ (ემილიმ), „აგნეს გრეი“ (ენმა) შექმნეს.
ბრონტეების ოჯახი იორკშირის საგრაფოს დაბა თორნტონში ცხოვრობდა, რომელსაც ახლა „ბრონტეების ქვეყანას“ უწოდებენ. მათი მამა - პატრიკ ბრონტე დაბა ჰოუვორთის ანგლიკანური ეკლესიის წინამძღვარი გახლდათ. დედის გარდაცვალების შემდეგ, ბავშვებზე ზრუნვა მისმა დამ - დეიდა ელიზაბეთმა იტვირთა.
გოგონები პატარაობიდანვე იყვნენ გატაცებულნი წერით და, მოზრდილთაგან განმარტოებულნი, სხვადასხვა ამბავს თხზავდნენ, ხოლო ზრდასრულებმა ლიტერატურული შემოქმედება პოეზიით დაიწყეს და 1846 წელს საკუთარი ხარჯით გამოსცეს ლექსების კრებული, ოღონდ, არა ნამდვილი სახელებით, არამედ ფსევდონიმებით - კერერ (შარლოტა), ელის (ემილი) და ეკტონ (ენ) ბელ, რადგან იმ დროს ლიტერატურული საქმიანობა ქალისთვის შეუფერებლად იყო მიჩნეული.
სამივე და სკოლის მასწავლებლად და გუვერნანტად მუშაობდა. 1842 წელს შარლოტა და ემილი, ფრანგული ენის ფლობის სრულყოფის მიზნით, ბრიუსელში გაემგზავრნენ, მაგრამ გამზრდელი დეიდის გარდაცვალების გამო იქიდან დაგეგმილზე ადრე დაბრუნდნენ. შემდგომ შარლოტა ბელგიაში კვლავ წავიდა და ინგლისურის მასწავლებლად მსახურობდა. 1845 წელს ოჯახმა ჰოუვორთში მოიყარა თავი. გოგონების ძმა, ბრონველი ამ დროს უკვე ალკოჰოლსა და ნარკოტიკებს ეტანებოდა.
დების პოეტურ კრებულს წარმატება არ ხვდომია, სამაგიეროდ, მალე რომანების წერას მიჰყვეს ხელი და შედეგმაც არ დააყოვნა. 1847 წელს ენის „აგნეს გრეი“ და შარლოტას „ჯეინ ეარი“ გამოიცა. ეს უკანასკნელი წლის ბესტსელერად იქცა. მომდევნო წელს დღის სინათლეზე გამოვიდა ენის მეორე რომანი - „უცნობი ქალი უაილდფელდჰოლიდან“ და ემილის „ქარიშხლიანი უღელტეხილი“. „უცნობი ქალის...“ პოპულარობას მოჰყვა ხმები, რომ მისი ავტორი - ეკტონ ბელი და „ჯეინ ეარის“ ავტორი - კერერ ბელი ერთი და იმავე პიროვნების ფსევდონიმები იყო. ჭორის გასაქარწყლებლად, შარლოტა და ენი წიგნის გამომცემელთან ლონდონში გაემგზავრნენ.
1848 წლის სექტემბერში ტუბერკულოზისგან გარდაიცვალა ძმა, ბრონველი; ამავე სენმა დეკემბერში იმსხვერპლა ემილი (1818-1848), ხოლო მომდევნო წლის მაისში – ენი (1820-1849). მამასთან მარტოდ დარჩენილმა შარლოტამ (1816-1855) წერა განაგრძო. ის უკვე სახელმოხვეჭილი მწერალი ქალი იყო და არაერთხელ სწვევია ლონდონს. 1849 წელს რომანი „შირლი“ გამოსცა. მისი ბოლო დასრულებული ნაწარმოები - „პატარა ქალაქი“ კი 1853 წელს გამოვიდა.
1854 წელს შარლოტა მამამისის სამრევლოს მღვდელს, ართურ ნიკოლსს გაჰყვა ცოლად. მაგრამ მისი ოჯახური ცხოვრება ძალზე ხანმოკლე აღმოჩნდა: 38 წლის მწერალი ქალი 1855 წლის 31 მარტს გარდაიცვალა.
შარლოტას უკანასკნელი თხზულება - „მასწავლებელი“ გამომცემლებმა არ მიიღეს და მხოლოდ ავტორის გარდაცვალების შემდეგ, 1857 წელს გამოვიდა დღის სინათლეზე.
ჩუქება
