წინასიტყვაობა ეს რომანი ახალგაზრდა ადამიანზეა, ქალზე, რომელიც რაღაც დროით დასუფთავების კომპანიაში დამლაგებლად მუშაობდა. მისი ემოციები, ფიქრები, განცდები, სურვილები და მიზნები ისეთივეა როგორც ყველა ჩვენთაგანისა. ყოველდღიურობა და თანმდევი პრობლემებიც ერთი შეხედვით ჩვეულებრივია, თუმცა საზოგადოების დამოკიდებულება ამ პროფესიის ადამიანების მიმართ აშკარად არაერთგვაროვანია. სწორედ ამ ჭრილშია ავტორის მიერ დანახული და გადმოცემული ეს ამბავი, ერთდროულად სევდიანიც, სახალისოც და დამაფიქრებელიც.
ჩემი ცხოვრების საკმაოდ დიდი ნაწილი დასუფთავების სფეროში საქმიანობას მივუძღვენი. კომპანია "სუფთა სამყარო", რომელიც 19 წლის წინ დავაარსე, დღემდე წარმატებით განაგრძობს საქმიანობას. მასში საკმაოდ ბევრი ადამიანია დასაქმებული. ამ პერიოდის განმავლობაში, მქონდა საშუალება პირადად ვყოფილიყავი ჩართული სამუშაო პროცესში და თვალნათლივ დამენახა მათი პროფესიონალიზმი, საქმისადმი დიდი სიყვარული და მიღებული შედეგებიდან განცდილი სიხარული.
ასეთი ნაწარმოების შექმნის იდეა რამოდენიმე წლის წინ გამიჩნდა და სასიხარულოა რომ თამარ შენგელიამ სრულიად ახლებულად დაგვანახა როგორც პროფესიული საქმიანობის მნიშვნელობა ისე ჩვენი საზოგადოების დამოკიდებულება ამ საქმიანობის მიმართ. აღსანიშნავია რომ ავტორი, გარკვეული პერიოდი სწორედ ჩვენს კომპანიაში მუშაობდა და ამან გავლენა მოახდინა ტექსტზე, მასში მოთხრობილ რეალისტურ ისტორიებზე, განცდებსა და გრძნობებზე.
ჯერ კიდევ ოციოდე წლის წინ, კომპანიის საქმიანობის ადრეულ პერიოდში, უზარმაზარი პრობლემები იყო ამ სფეროს ყველა მიმართულებით. ჩვენს თავზე, ჩვენს თანამშრომლებზე გადაირა ამ პრობლემების გადაჭრამ და ახლა, როცა ბევრად შეიცვალა როგორც სამუშაო გარემო, ხარისხი, დამოკიდებულება სპეციალისტების მიმართ, სწორედ ამ კეთილსინდისიერი და პროფესიონალი ადამიანების დამსახურებაა.
ნაწარმოები, ჩვენი კომპანიის და მისი თანამშრომლების რეალურ ისტორიებზე დაყრდნობით არის შექმნილი. იმედი მაქვს, რომ წინამდებარე რომანი არამხოლოდ დასუფთავების სფეროში დასაქმებული ადამიანების, არამედ საინტერესო ისტორიების მოყვარულთა საკითხავი წიგნი გახდება და ხელს შეუწყობს მათ მიმართ, საზოგადეობის მხრიდან ჯანსაღი დამოკიდებულების შექმნას.
აპოლონ გოლეთიანი
კომპანია "სუფთა სამყაროს" ხელმძღვანელი
ჩუქება
