ხუჭუჭას თავგადასავალი პირქუშ და ცივი ზღვის სანაპიროზე ცხოვრობდა ლამაზი, პატარა გოგონა, რომელსაც ხუჭუჭას ეძახდა მთელი სანაპიროს მოსახლეობა. იგი განსხვავებული "ბრძანდებოდა" ყველასგან და ამიტომაც მუდამ ქილიკის ობიექტი იყო.
ხუჭუჭას ლამაზი დიდი თვალები და მუდამ ღიმილიანი სახე ჰქონდა. გრძელი, გრძელი ხუჭუჭა თმები კი წელამდე სწვდებოდა. იგი ყველას ეხმარებოდა და თავს ევლებოდა, მაგრამ მის ამ საქციელს არავინ ხედავდა.
პატარა გოგონას მიუხედავად ყველაფრისა ბრაზი არ შეჰპარვოდა და მუდამ ზრუნავდა პირქუში, ცივი სანაპიროს ხალხზე. მისი კეთილი გული იყო მისი საგანძური.
ერთ დღესაც ხუჭუჭამ განიზრახა წასულიყო სხვა ზღვის სანაპიროებზე და ენახა იქ რა ხდებოდა, შეესწავლა ახალი ხილი და შემდგომ მისი სანაპიროს ხალხისთვის გაეზიარებინა.
ცივი, პირქუში სანაპიროს ხალხს ეს ამბავი პირიქით გაეხარდათ, იფიქრეს როგორც იქნა მოვიშორეთ ხუჭუჭაო, არადა პატარა საყვარელ გოგონას მათზე ზრუნვით ჰქონდა გული სავსე.
გულკეთილმა ხუჭუჭამ ბევრი იარა უცხო სანაპირომდე და დაღლილს ჩაეძინა. სიზმრად კი თავის ცივი და პირქუში სანაპიროს ხალხი ესიზმრებოდა და სიზმარშიც მათ უღიმოდა.
გამოღვიძებულს ხუჭუჭას თავზე პატარა, ლამაზი მელაკუდა დასდგომოდა და დიდი ინტერესით უყურებდა. ხუჭუჭა არ დაიბნა და თავის საგზალიდან საკვები გაუნაწილა მელაკუდას, შემდეგ ერთად გააგრძელეს გზა.
მელაკუდა სულ ეთამაშებოდა მის ახალ მეგობარს და ეალერსებოდა, ხუჭუჭა კი მის დედიკოზე ფიქრობდა, რადგან პატარა მელაკუდაზე აუცილებლად ინერვიულებდა, ამიტომაც გეგმები შეცვალა და მელიას ძებნას შეუდგა.
ხუჭუჭამ ტყისკენ გადაუხვია და ხაფანგში გაება, იგი და მისი მეგობარი მელაკუდა ორმოში ჩავარდნენ. ძალიან შეეშინდათ მეგობრებს.
დაღამებისას როგორც იქნა ხუჭუჭამ შეძლო მელაკუდას ზევით აფოფხება და ორმოს თავი დააღწევინა, სამწუხაროდ თვითონ ვერ ამოვიდა და ცრემლიანი დარჩა ბედის ანაბარა.
შუაღამისას ორმოში დიდი ფრინველი ჩაფრინდა, რომელსაც საშიში წითელი თვალები ჰქონდა.
ფრინველს ხუჭუჭას თავის ბუდეში წაყვანა სურდა, რომელიც ზევით დიდ კლდეზე იყო. წინააღმდეგობა გაუწია პატარა უშიშარმა გოგონამ და მოიგერია, მაგრამ იცოდა, რომ ფრინველი კიდევ დაბრუნდებოდა.
ზუსტად ესეც მოხდა, წითელ თვალებიანი ფრინველი დაბრუნდა და ხუჭუჭას თმებში კლანჭები ჩაასო და ორმოს ასცდნენ ორივე.
ის იყო რომ ჰაერში უნდა აჭრილიყო ფრინველი მას უცაბედად მელიების ოჯახმა შეუტია და პატარა გოგონა ხუჭუჭა გაანთავისუფლეს.
პატარა მელაკუდამ, რომელსაც ხუჭუჭა ორმოდან თავის დაღწევაში დაეხმარა, არ დაივიწყა მეგობარი და მის დასახმარებლად მოვიდა ოჯახთან ერთად.
ხუჭუჭა სუყველას ჩაეხუტა და მელიების ოჯახს თავისი საუკეთესო ვახშმით გაუმასპინძლდა....
მას ისე მოეწონა მელიების სითბო, რომ მათთან დარჩა და აღარსად აღარ წასულა.
ბავშვებო ოჯახი და მეგობრები თქვენი ძალა და ზურგია, გიყვარდეთ და დაიცავით მუდამ.
ჩუქება
