გურამი საქართველოში, ლამაზ და დიდ მთაზე ცხოვრობდა გოლიათი გურამი. კეთილი და სამშობლოს სიყვარულით გაჟღენთილი მებრძოლი, რომელსაც ოცნებად ჰქონდა საბრძოლო ხელოვნებაში ყოფილიყო ჩემპიონი.
გურამი ყოველ დილა-საღამოს ვარჯიშობდა და თავს არ ზოგავდა, იგი თავის ოცნებების ერთგული იყო.
მთიდან მხოლოდ მაშინ ჩამოდიოდა, როცა მთის ძირში მდებარე პატარა ადამიანების სოფელს შეშის დაჩეხვა დასჭირდებოდა. გურამი ზაფხულობით ბავშვებს წყალს უგუბებდა წინასწარ გაკეთებულ ორმოში და ტკბებოდა თუ როგორ ჭყუმპალაობდნენ და ხარხარებდნენ ისინი.
ერთ ღამეს როცა გურამის ეძინა, მის სახლში დიდი მრგვალი ბურთი გამოჩნდა რომელიც მას ეძახდა.
- გურამიიიიი
- გურამიიიიი
გოლიათს გამოეღვიძა და მრგვალ ბურთს მიესალმა.
ბურთი მას გალაქტიკის ტურნირზე ეპატიჟებოდა, როგორც დედამიწის დამცველს, გურამიმ მხარზე საქართველოს უმშვენიერესი და მისი აღმატებულობა დროშა დააბრძანა და დაუფიქრებლად გაჰყვა მრგვალ ბურთს.
რამოდენიმე წამში იგი დიდ არენაზე აღმოჩნდა, სადაც მრავალი კეთილი და ბოროტი არსება შეკრებილიყო.
გოლიათმა არავინ არ შეიმჩნია და მისი პირველი მეტოქე, ქვის ლომი, რამოდენიმე წამში დაამარცხა.
ყველას გაუკვირდა მათთვის უცხო არსების ესეთი გამარჯვება.
საზოგადოება ძალიან გაბრაზდა მათი ფალავანის დამარცხებით, ამიტომ გურამის მეორე მეტოქედ დიდი თეთრი დათვი შეურჩიეს, რომელიც საქართველოს გოლიათზე ათჯერ დიდი იყო.
მაგრამ გურამი არ დაბნეულა, გაახსენდა მისი ჭიდაობის ვარჯიშები, მისი ძმაკაცების ნასწავლი სახელოვანი ქართული ილეთები და სულ კუდით ქვა ასროლინა თეთრ დათვს. მეხუთედ რომ დასცა ზურგზე, თეთრი დათვი იძახდა - სუფთა, სუფთაო - და აღარც ადგა ფეხზე.
საქართველოს მარგალიტმა ფინალისკენ გზა გაიკვალა და მისი ოცნებები ძალიან ახლოს ბრძანდებოდა.
ფინალში მას ორი მეტოქე დაახვედრეს ცბიერმა გალაქტიკელებმა. ერთი რკინის ადამიანი რომელსაც თვალების გარდა არაფერი ჰქონდა სხეულზე და მეორე ოქროსფერი არწივი რომელიც ჰაერიდან აპირებდა გურამიზე შეტევას.
მაგრამ სამართლიანობა მრგვალმა ბურთმა აღადგინა და რინგზე გოლიათის ქართველი მეგობრები გააჩინა, რომლებიც იმ წამსვე ჩაერთვნენ ბრძოლაში.
რა თქმა უნდა, დიდი დრო არ დასჭირვებიათ ქართველებს გასამარჯვებლად.
სანამ გურამი რკინის ადამიანს ოთხად კეცავდა თავისუფალი ჭიდაობის ილეთბით, მისი მეგობრები არწივისგან ჩახოხბლის აკეთებდნენ უკვე.
გამარჯვებულებმა საქართველოს დროშა ააფრიალეს ყველაზე მაღლა, ჰიმნი იმღერეს და მრგვალი ბურთის დახმარებით უკან დაბრუნდნენ მთაზე, სადაც დიდი ნადიმი გამართეს....
ჩუქება
