ქართველი გამომცემლისგან ქართველი გამომცემლისგან
ეს წიგნი ქართველ მკითხველს ათი წელი “ ემალებოდა ” . უნიკალური ხელოვანის უთვალავ ინტერვიუს, ცოცხალ, ექსპრომტად შეთხზულ მოთხრობებს მხოლოდ აქ იხილავთ. და თქვენ წინაშე გადაიშლება რეზო გაბრიაძის უკიდეგანო, ზღაპრული სამყარო - მისი განუმეორებელი ნახატებით, მისი და წიგნის ავტორის პირად არქივში დაცული ფოტოებით, საოცარი მოგონებებით.
ამ ყველაფერს და კიდევ ბევრ სხვა საინტერესო ამბავს მარგალიტებივით აგროვებდა და ოთხი წლის განმავლობაში აქვეყნებდა სოლიდურ გამოცემაში - “ პეტერბურგსკი ტეატრალნი ჟურნალ ” - ცნობილი რუსი თეატრმცოდნე მარინა დმიტრევსკაია, შემდგომ კი წიგნად გამოსცა.
წარმოუდგენელია, რომ ეს “ წიგნი-თეატრი ” ქართულ ენაზე არ არსებობდეს. არადა, მისი პირველი გამოცემიდან (სულ კი პეტერბურგში სამჯერ გამოიცა) ათი წელი გავიდა!
“ წარმოუდგენელი ” იმიტომ ვთქვით, რომ ვფიქრობთ, ქართული ხელოვნების გამორჩეული მოვლენის, ცოცხალი ლეგენდის - რეზო გაბრიაძის შემოქმედებითი “ სახლის ” ყველა “ კუთხე-კუნჭული ” იმ სულიერი საგანძურის ნაწილია, რომელსაც ჩვენი საზოგადოება უნდა იცნობდეს.
და მაინც, თავად ბატონი რეზო, დიდი ადამიანებისთვის ჩვეული თავმდაბლობის გამო, ჩვენი ინიციატივის ხორცშესხმის საჭიროებაში დაეჭვდა. მისთვის დამახასიათებელი ბავშვური მოკრძალებით გვეკითხებოდა, - განა ეს ვინმეს სჭირდება?!.
მგონი, ბოლოს და ბოლოს, დავარწმუნეთ.
მაგრამ შემდეგ ახალი ეჭვი გაჩნდა: რუსულად ნაამბობი, ჯერ ექსპრომტად შეთხზული, მერე დაწერილი და გადაწერილი, წიგნის ავტორისა და თავად ავტორის მიერ თითოეული სიტყვის აწონ-დაწონის შედეგად “ ჩამოსხმული ” მოთხრობები ქართულად როგორი გამოვიდოდა? ვარწმუნებდით, რომ ჩვენც თითოეულ სიტყვას რუდუნებით მოვეკიდებოდით და დედნისეული ტექსტის “ სულს ” არ გამოვაცლიდით.
მგონი, დავარწმუნეთ, ოღონდ - ნაწილობრივ... ბოლომდე მაინც - ვერა.
ამიტომაც ავიტაცეთ კვლავ და კვლავ და ისევ და ისევ თავად ბატონი რეზოს გამომგონებლობის წყალობით გაჩენილი იდეა - წიგნის სრულ (და იმედია, სრულყოფილ) თარგმანთან ერთად, მისი ნაწილი - რეზო გაბრიაძის მოთხრობები დედნის ენაზეც წარმოგვედგინა. ამის შედეგად გაჩნდა “ დამატება ” , რომელსაც ქართული ტექსტის შემდეგ იხილავთ უცვლელად, ისე, როგორც ეს პეტერბურგულ გამოცემაშია. ამგვარად, ორივე ენის მცოდნე მკითხველს შედარების შესაძლებლობა ექნება.
ვიმედოვნებთ, ძვირფასო მკითხველო, ორივე შემთხვევაში ამ სამყაროსთან შეხვედრა სიამოვნებას განგაცდევინებთ. ამით ჩვენი მოკრძალებული მისიაც შესრულებული იქნება.
” კალამი ”
2015 წელი
ჩუქება
