*** საქართველოს საგამომცემლო შესწორებათა და მორალის კომისია აფრთხილებს მოქალაქეებს, რომ წარმოდგენილი ტექსტები არაა ჩვენი საზოგადოებისთვის შესაფერისი და, ამრიგად, მათი წაკითხვა სრულებით არ არის მიზანშეწონილი.
საქართველოს საზოგადო მოღვაწეთა დასი გამოთქვამს შეშფოთებას ბატონი მირიან რჩეულიშვილის წიგნის გამო და წუხს, რომ ერთ დროს ისეთი განდიდებული სფერო, როგორიც ლიტერატურაა, დღეს ზოგ-ზოგიერთებს ასეთ დაბალ დონეზე დაჰყავთ. მოცემული წიგნი არ შეიცავს არც ერთ წვეთ ლიტერატურულ ღირებულებას და მისი ადგილი მხოლოდ მეხსიერების ნაგავსაყრელზეა.
თბილისელ ინტელექტუალთა გაერთიანება „ტიფლისი“ შეურაცხყოფილი ვართ ბატონი მირიან რჩეულიშვილის წიგნით, რომლისთვისაც უსირცხვილოდ უნდოდა ეწოდებინა „თბილისელი ნაბიჭვრები“, მაგრამ ჩვენი დამსახურებით, ამის საშუალება არ მიეცა. თბილისის ინტელიგენცია ამას არ იმსახურებს და უკანასკნელ ამოსუნთქვამდე იბრძოლებს, რათა ეს წიგნი ამოღებულ იქნეს მაღაზიებიდან.
საქართველოს ფემინისტური მოძრაობა „ყველაფერი ქალებისთვის“ ლიდერი, ჟანა უკაცაშვილი, გმობს ხსენებულ ნაწარმოებს ჰომოფობიური, ქსენოფობიური და მიზოგინიური გამონათქვამების გამო. მოძრაობა „ყველაფერი ქალებისთვის“ სრულიად ეწინააღმდეგება ბატონი მირიან რჩეულიშვილის აქ წარმოჩენილ ქალთმოძულეობასა და ქალების მიმართ გამოყენებულ დამამცირებელ ლექსიკას.
ქართველ მშობელთა გაერთიანება „ჩვენი შვილებისათვის“ კატეგორიულად გმობს ამ წიგნის არსებობას და მოგიწოდებთ თქვენ, კეთილგონიერ მშობლებს, რომ არაფრის დიდებით არ წააკითხოთ თქვენს პატარებს ეს ე.წ. ნაშრომი. ესაა ვერაგი ძალების მორიგი ცდა, რომ შეულახონ და თავიდანვე შეურყვნან ჩვენს შვილებსა და მომავალ თაობას ზნეობა, სინდისი და რწმენა.
ქართველ ვაჟკაცთა ალიანსი „ძალა საქართველოშია“ მწუხარებას გამოთქვამს იმის თაობაზედ, რომ ეს წიგნი გამოიცა და ხელმისაწვდომია მთელ საქართველოში. ჩვენი აზრით, ნამდვილი ქართველი მამულიშვილი ასეთ წიგნებს არ უნდა წერდეს და, მით უმეტეს, არ უნდა ავრცელებდეს. ესაა მორიგი პროპაგანდა. იმედია, ჩვენი ძმა, მირიან რჩეულიშვილი, მალე მოეგება გონს და ნებას მოგვცემს ცხოვრებაში სწორ გზაზე დავაყენოთ.
„საქართველოს ქრისტიანთა კერა“ გმობს ხსენებულ წიგნს რელიგიისა და უფლისადმი შეურაცხმყოფელი განცხადებების გამო და მოუწოდებს ბატონ მირიან რჩეულიშვილს, საჯაროდ მოიხადოს ბოდიში. ჩვენი აზრით, საქართველო ნამდვილ მართლმადიდებელ ქრისტიანთა ქვეყანაა და ყველამ პატივი უნდა სცეს ჩვენს რელიგიას.
საჯარო სკოლათა დირექტორების კოალიცია „ახალი თაობა ჩვენია“ უარს აცხადებს ხსენებული წიგნის საჯარო სკოლათა ბიბლიოთეკების თაროებზე, ილია ჭავჭავაძისა და აკაკი წერეთლის გვერდით განთავსებაზე.
„თბილისის მუნიციპალიტეტის პოლიციელთა ალიანსი“ აცხადებს, რომ მოცემულ წიგნში ასახულია კანონდარღვევის არაერთი ფაქტი. მათი მიბაძვა, გამეორება ან წახალისება დაისჯება კანონით. წიგნი მიზანმიმართულად ცდილობს ჩვენს წყნარ, მშვიდობიან და ბანკებდაცულ საზოგადოებაში გამოიწვიოს არეულობა, ავტორიტეტისადმი უნდობლობა და ქაოსი. წიგნის ავტორის, ბატონი მირიან რჩეულიშვილის წინააღმდეგ უკვე ამოქმედებულია შერჩევითი სამართლის რამდენიმე მუხლი.
საქართველოს რედაქციათა კომიტეტი „კლიმის ფაცხა“ გაცნობებთ, რომ ამ წიგნის დაბეჭდვაზე უარი განაცხადა საქართველოს ყველა რედაქციამ და ჩვენი კომიტეტი ერთხმად გმობს ამ ნაწარმოების არსებობას. ბატონ მირიანს კი ვუსურვებთ წარმატებებს სხვა სფეროებში.
თინეიჯერები ვებ-გვერდიდან TikTokTeens.com, მიუხედავად იმისა, რომ ფეხებზე ჰკიდიათ ყველა ზემოთ ჩამოთვლილი ორგანიზაცია, მაინც უერთდებიან მათ აღშფოთებას და, როგორც მინიმუმ, ემიჯნებიან მირიან რჩეულიშვილის ნარატივს – „ის არ წარმოადგენს ჩვენს თაობას, ჩვენს გემოვნებას, ჩვენს ცხოვრებას, მისწრაფებებსა და ფასეულობებს!” #გამიჯვნააა!
თბილისის სახელმწიფო უნივერსიტეტი ემიჯნება მისი ყოფილი სტუდენტის, მირიან რჩეულიშვილის ნაწარმოებში გაჟღერებულ ნარატივს და გაცნობებთ, რომ სანამ ის ჩვენთან მოხვდებოდა მაგისტრატურაზე, ბაკალავრიატი საქართველოს ტექნიკურ უნივერსიტეტში (ე.წ. გეპეიში) აქვს დამთავრებული, სადაც, ალბათ, იყო კიდეც მისი ადგილი. უნივერსიტეტის შეურაცხყოფისათვის მას გავრიცხავდით ჩვენი დაწესებულებიდან, მაგრამ უკვე მოუსწრია სამაგისტრო ნაშრომის დაცვა. ამიტომ დიპლომს, რომელიც არ დაგვიბეჭდავს და არ გადაგვიცია მისთვის, ამიერიდან კიდევ უფრო ძლიერად არ დავბეჭდავთ და არ გადავცემთ. საქართველოს უნივერსიტეტის შეურაცხყოფა არის ყველა გამოჩენილი ქართველი აკადემიკოსისა და მეცნიერის შეურაცხყოფა, უკვე გარდაცვლილებისა თუ აწ გარდასაცვლელებისა.
თბილისის ივანე ჯავახიშვილის სახელობის სახელმწიფო უნივერსიტეტის სტუდენტების დაჯგუფებების „ქორფა უფლებადამცველებისა“ და აუდიტორია 69-ის წევრები ვაცხადებთ, რომ მირიან რჩეულიშვილი არ წარმოადგენს თბილისის ივანე ჯავახიშვილის სახელობის სახელმწიფო უნივერსიტეტის სტუდენტის სახეს და არც ჩვენს ხედვებს. მისი წიგნი სრულიად მიუღებელია ქართველი მოსწავლე-ახალგაზრდობისათვის.
ჩუქება
