შავი პრიზმა

ამერიკელი მწერალი ბრენტ უიქსი 1977 წელს დაიბადა. კოლეჯის დამთავრების შემდეგ, ერთხანს, ბარში მცველად მუშაობდა და თან სკოლაში ინგლისურ ლიტერატურას ასწავლიდა. თავდაპირველად ბარის ხელსახოცებზე წერდა, მერე – გაკვეთილების ცხრილზე, მერე – ყველგან, სადაც მოახერხებდა. ბოლოს კი მიხვდა, რომ მწერლობას სერიოზულად უნდა მოჰკიდებოდა. პირველი ნაწარმოები, ტრილოგია „ღამის ანგელოზი“, 2008 წელს გამოაქვეყნა. „ნათლისმტვირთველის“ პირველი წიგნი „შავი პრიზმა“ 2010 წელს გამოიცა. მწერალმა კვლავაც ტრილოგია ჩაიფიქრა, მაგრამ 2012 წელს მისმა გამომცემლებმა განაცხადეს, რომ სერიაში ოთხი წიგნი იქნებოდა, 2016 წლის მაისში კი ბრენტ უიქსმა თავისი ოფიციალური საიტით აცნობა მკითხველს, რომ სერიის მეხუთე წიგნიც გამოიცემა. გევინ გაილი პრიზმაა, ყველაზე ძლევამოსილი ადამიანი მსოფლიოში, კაცი, რომლის ძალას, ჭკუასა და სახელს არეული მსოფლიოს დამშვიდება შეუძლია, თუმცა პრიზმები უკვდავნი არ არიან და გაილმაც ზუსტად იცის, რამდენ ხანს იცოცხლებს, სიკვდილამდე კი ყველა მიზნის ასრულება უნდა მოასწროს. მაგრამ როდესაც შეიტყობს, რომ ჰყავს ვაჟი, რომელიც შორეულ სამეფოში ომის შემდეგ დაიბადა, იძულებულია, აირჩიოს – აღიაროს სიმართლე თუ შეინახოს საიდუმლო, რომლის გამჟღავნებას მისი სამყაროს დამსხვრევა შეუძლია.