1 ტომმა უკან მიიხედა, დაინახა, რომ ბარ "მწვანე გალიიდან" გამოსული კაცი უახლოვდებოდა და ნაბიჯს აუჩქარა. ეჭვი არ ეპარებოდა, რომ კაცი სწორედ მას მოსდევდა. ხუთი წუთის წინ შენიშნა ეს კაცი, რომელიც მაგიდასთან იჯდა და ყურადღებით აკვირდებოდა, თითქოს ფიქრობდა, ვიცნობ თუ არაო. ისე დაჟინებით უყურებდა, რომ ტომმა სწრაფად გამოცალა ჭიქა, ფული გადაიხადა და წავიდა.
კუთხეში სირბილით გადაჭრა მეხუთე ავენიუ. იქვე ბარი "რაული" ეგულებოდა. იქნებ შესულიყო და ცოტა კიდევ დაელია? საფრთხისთვის ყურადღება არ მიექცია? ან იქნებ პარკ-ავენიუზე გამსხლტარიყო, სადაც ბნელ სადარბაზოებში დამალვა შეიძლებოდა? ტომი ბარში შევიდა.
სანამ ბარის თავისუფალი ტაბურეტისკენ მიდიოდა, მიიხედ-მოიხედა, ვინმე ნაცნობი ხომ არ ზისო. ერთ-ერთ მაგიდასთან მჯდარი ჩასკვნილი წითურთმიანი მამაკაცი, რომელსაც ახალგაზრდა ქერა ქალი ახლდა, მიესალმა. ტომმაც ზანტად დაუქნია ხელი. ტაბურეტზე გვერდულად ჩამოჯდა. გამომწვევად, მაგრამ განზრახ დაუდევრად შეავლო თვალი კარს.
- ჯინი და ტონიკი, თუ შეიძლება, - მიმართა ბარმენს.
ეს კაცი გამოგზავნეს მის სათვალთვალოდ? თუ არა? პოლიციელს ან დეტექტივს კი არა, ბიზნესმენს, ოჯახის მამას ჰგავს. კოხტად ჩაცმული, ჩასუქებული, შევერცხლილი საფეთქლებით, ორჭოფული მზერით. სწორედ ასეთებს გზავნიან ხოლმე მსგავსი დავალებების შესასრულებლად. ჯერ ბარში გაგესაუბრება, მერე უეცრად ხელს მხარზე დაგადებს, მეორე ხელით კი პოლიციელის ჟეტონს გიჩვენებს. "ტომ რიპლი, დაპატიმრებული ხართ!". ტომი კარს თვალს არ აცილებდა.
აი, შემოვიდა. მიიხედ-მოიხედა, ტომი დაინახა და მაშინვე შეტრიალდა. ჩალის ქუდი მოიხადა და ბარის დახლის მომრგვალებულ კუთხესთან დაჯდა.
ღმერთო ჩემო, რა უნდა ამ კაცს? ჰომოსექსუალი ნამდვილად არააო, მეორედ გაიფიქრა ტომმა. გაწამებულმა ტვინმა ახლაღა იპოვა და უკარნახა ეს სიტყვა, რომელმაც თითქოს შვება აგრძნობინა, რადგან ტომს ერჩივნა, ეს კაცი ჰომოსექსუალი ყოფილიყო და არა პოლიციელი. ჰომოსექსუალს, უბრალოდ, ეტყოდა, არა, გმადლობთო და ღიმილით გაშორდებოდა. ტომი კვლავ ტაბურეტზე ჩამოჯდა და მხნეობა მოიკრიბა.
კაცმა ბარმენს ანიშნა, ჯერ არაფერი მინდაო და ტომისკენ გამოემართა. ტომი არ განძრეულა. ათ წელზე მეტს არ მომისჯიანო, გაიფიქრა. შეიძლება, თხუთმეტ წელსაც, მაგრამ თუ კარგად მოვიქცევი … როდესაც კაცმა ტუჩები აამოძრავა, ტომს საშინელი, მტანჯველი სინანულის გრძნობა დაეუფლა.
- უკაცრავად, თქვენ ტომ რიპლი ხართ?
- დიახ.
- ჰერბერტ გრინლიფი ვარ, რიჩარდ გრინლიფის მამა.
გრინლიფის სახის გამომეტყველებამ ტომი ისე გააკვირვა, თითქოს მისთვის უეცრად პისტოლეტი მიეშვირათ. გრინლიფი მეგობრულად იღიმებოდა და ტომი გამხნევდა.
- რიჩარდის მეგობარი ხართ, ხომ?
ტომს გონება ოდნავ გაუნათდა. დიკი გრინლიფი. მაღალი ქერათმიანი ყმაწვილი. ტომს გაახსენდა, რომ დიკის ყოველთვის უამრავი ფული ჰქონდა.
- ოჰ, დიკი გრინლიფი. დიახ.
- ჩარლზ და მარტა შრივერებსაც უნდა იცნობდეთ. მათ მიამბეს თქვენზე, იმაზე, რომ თქვენ … იქნებ მაგიდასთან დავსხდეთ?
- დავსხდეთ, - დაეთანხმა ტომი და თავისი ჭიქა აიღო. კაცს პატარა დარბაზის ბოლოსკენ, ცარიელი მაგიდისკენ გაჰყვა. განაჩენი გაუქმებულიაო, გაიფიქრა. თავისუფალია! მის დაპატიმრებას არავინ აპირებს. რაღაც სხვაშია საქმე. რაც უნდა იყოს, საქმე ქურდობას, საბუთების მოპარვას ან რამე ამგვარს არ ეხება. შესაძლოა, რიჩარდი რამე უსიამოვნო ამბავში გაეხვია და მისტერ გრინლიფს დახმარება ან რჩევა სჭირდება. ტომმა იცოდა, როგორ უნდა ელაპარაკა ასეთ მამებთან.
- დარწმუნებული არ ვიყავი, რომ ტომ რიპლი ხართ, - თქვა მისტერ გრინლიფმა. - მგონი, მხოლოდ ერთხელ მყავხართ ნანახი. გახსოვთ, რიჩარდთან ერთად რომ გვესტუმრეთ?
- დიახ, მახსოვს.
- შრივერებმა თქვენი გარეგნობა ამიწერეს. ყველანი ვცდილობდით თქვენს პოვნას, რადგან შრივერებს უნდოდათ, მათ სახლში შევხვედროდით ერთმანეთს. ვიღაცამ უთხრა, რომ დროდადრო "მწვანე გალიაში" დადიხართ. ამ საღამოს პირველად ვცადე თქვენი მოძებნა და გიპოვეთ კიდეც.
მან გაიღიმა.
- გასულ კვირას წერილი გამოგიგზავნეთ, მაგრამ, მგონი, არ მიგიღიათ.
- არა.
მარკი წერილებს უმალავს. გაიძვერა! ალბათ, დეიდა დოტის გამოგზავნილი ჩეკიც მიითვისა.
- ერთი კვირის წინ საცხოვრებლად სხვაგან გადავედი, - დასძინა ტომმა.
- გასაგებია. იმ წერილში ყველაფერი არ დამიწერია, რის შეტყობინებაც მსურდა. მხოლოდ ის მოგწერეთ, რომ თქვენთან შეხვედრა და გასაუბრება მინდოდა. შრივერები დარწმუნებული არიან, რომ რიჩარდს კარგად იცნობდით.
- დიახ, მახსოვს ის.
- მაგრამ ერთმანეთს წერილებს არ სწერთ?
მისტერ გრინლიფს სახეზე იმედგაცრუება დაეტყო.
- არა. უკვე ორი წელია, დიკი არ მინახავს.
- ორი წელია, რაც დიკი ევროპაში იმყოფება. შრივერები დიდ პატივს გცემენ და ფიქრობენ, რომ შეიძლება, რიჩარდი შტატებში დაბრუნებაზე დაიყოლიოთ, თუ მისწერთ. მინდა, რომ დაბრუნდეს. აქ გარკვეული მოვალეობები აქვს, მაგრამ არც მე და არც დედამისს არაფერს გვიჯერებს.
ტომი გაოცდა.
ჩუქება
